2021 පෙබරවාරි මස 19 වන දින කමිටුව පත් කරනු ලැබිණ.
කමිටු වාර්තාව මාර්තු මස 15 වන දිනට පෙර ඉදිරිපත් කිරීමට නියමිතව තිබුණ ද වැඩිදුර විමර්ශනය සඳහා කමිටුව තවත් සති දෙකක කාලයක් ලබා ගත්තේය.
පාස්කු ඉරිදා ප්‍රහාරය සම්බන්ධයෙන් වූ වාර්තා දීර්ඝ ලෙස අධ්‍යයනය කළ කමිටුව නිර්දේශ 78ක් හඳුනාගෙන තිබේ. එම නිර්දේශ ක්‍රියාත්මක කරන්නේ කෙසේද, ක්‍රියාත්මක කරන්නේ කුමන ආයතන ද යන්න වාර්තාවට ඇතුළත් කර ඇත.

නීතිමය කාරණා පිළිබඳ නිර්දේශ මීට පෙර නීතිපතිතුමා වෙත යොමු කරනු ලැබීය.
කමිටුවේ සෙසු සාමාජිකයන් වන අමාත්‍ය ජොන්ස්ටන් ප්‍රනාන්දු, රමේෂ් පතිරණ, ප්‍රසන්න රණතුංග, රෝහිත අබේගුණවර්ධන සහ කමිටුවේ ලේකම් ජනාධිපති කාර්යාලයේ අධ්‍යක්ෂ ජනරාල් (නීති) හරිගුප්ත රෝහණධීර යන අය වාර්තාව භාරදීමේ අවස්ථාවට එක්ව සිටියහ.

මේ අතර පාස්කු ප්‍රහාරය සම්බන්ධයෙන් සාධාරණයක් ඉටු නොවුණහොත් බෞද්ධයන් ලෙස යම් යම් තීරණයන්ට එළැඹීමට සිදුවන බව පූජ්‍ය ඇල්ලේ ගුණවංශ හිමියෝ පවසති. උන්වහන්සේ මේ බව සඳහන් කළේ කොළඹදී ඊයේ (5 වැනිදා) අදහස් දක්වමිනි.

කාදිනල්තුමන්ගේ කලකිරීම සාධාරණ යැයිද, ඇල්ලේ ගුණවංශ හිමියෝ සඳහන් කරති. තමන් වහන්සේගේ අවබෝධය පරිදි කොමිෂන් සභා වාර්තාවෙන් විශාල පිරිසකට චෝදනා එල්ල වී ඇතැයිද එක් පුද්ගලයකුට නොව ඒ සියලු දෙනාට නඩු පැවැරිය යුතු යැයිද උන්වහන්සේ කියා සිටිති.

පාස්කු ප්‍රහාරය එල්ල වී වසර 2 ක් වැනි කාලයක් ගතව තිබුණද එයට සාධාරණයක් ඉටුවී නොමැති බැවින් බෞද්ධ ජනතාව ලෙස කිතුනුවන් වෙනුවෙන් රජයට කරුණු දැක්විය හැකි බවද උන්වහන්සේ එහිදී පවසති.

-පංචාලි අබේසේකර