ජනාධිපති ගෝඨාභය රාජපක්ෂගේ "සෞභාග්‍යයේ දැක්ම" ප්‍රතිපත්ති ප්‍රකාශනයේ රථ වාහන තදබදයට ඉදිරිපත් කර ඇති විසඳුම් යෝජනාවලට අනුව කොළඹ මෙන් ම දිවයින පුරා රථ වාහන තදබදය පවතින ප්‍රධාන නගරවල නව රථගාල් ඉදිකිරීමට නියමිතය.

යෝජිත රථගාල් 12 අතරින් කොළඹ කොටුව සහ නාරාහේන්පිට රථගාල් දෙකේ ඉදිකිරීම් කටයුතු මේ වන විට ආරම්භ කර ඇති අතර ඉබ්බන්වල හන්දියේ ඉදිකෙරෙන්නේ තුන්වැනි රථගාල ය. එකවර රථවාහන 310ක් නවතා තැබිය හැකි මෙම රථගාල ඉදිකිරීමත් සමඟ ම දැනට එම ප්‍රදේශයේ පවතින වාහන තදබදය අවම වනු ඇත.

මරදාන පාර, ටී.බී. ජයා මාවත, ධර්මපාල මාවත, යූනියන් පෙදෙස, කිංසි පාර ඇතුළු මාර්ග ගණනාවක පවතින වාහන තදබදයට මෙමඟින් පිළියම් යෙදෙන අතර කොළඹ මහ රෝහල් පරිශ්‍රය අවට වාහන තදබදයට ද විසඳුම් ලැබේ.
ඉබ්බන්වල හංදියේ රථගාල මහල් 10 කින් සමන්විත අතර එය නාගරික සංවර්ධන අධිකාරියේ උපදෙස් අනුව ඉදිවෙයි. නව රථගාලේ වපසරියෙන් 80% ක්

වාහන නවතා තැබීම සඳහා වෙන් කෙරෙන අතර ඉතිරි 20% කාර්යාල සහ සාප්පු පරිශ්‍රයක් සඳහා වෙන්කෙරේ. එනම් මෙහි බිම් මහල, පළමු මහල සහ දෙවන මහල කාර්යාල සහ සාප්පු සංකීර්ණ සඳහා වෙන් කෙරේ. තෙවන මහලේ සිට දසවන මහල දක්වා වෙන් වන්නේ යෝජිත රථ ගාල සඳහා ය.
ඉබ්බන්වල හන්දියේ මෙම නව රථගාල සඳහා ආයෝජනය කරන මුළු මුදල රුපියල් මිලියන 605 කි. මේ සඳහා වෙන්කර ඇත්තේ ඉබ්බන්වල හන්දියේ පිහිටා තිබෙන නාගරික සංවර්ධන අධිකාරිය සතු ඉඩමකින් පර්චස් 113 ක් වන අතර මෙම රථගාල වර්ග අඩි 31, 000 කින් සමන්විත ය.

-පංචාලි අබේසේකර