කැබිනට් මණ්ඩලයේ බහුතරයක්ද ද සිටින්නේ විකිණීමක් කළ යුතු නොවේය යන පදනමේ වන හෙයින් කාරණාව ගැන තමන් සමඟ කතාකළා නම් සේවකයින්ට වැඩ වර්ජන කිරීමේ අවශ්‍යතාවක්ද මතු නොවන බවයි රාජපක්ෂ මහතා සඳහන් කරන්නේ.
අගමැතිවරයා මෙම කරුණු පැහැදිලි කර තිබුණේ තංගල්ලේදී මාධ්‍යවේදී හමුවක දීය.
“ඇත්ත වශයෙන්ම විපක්ෂයට චෝදනා කරන්න දෙයක් නැහැ. අපි කාටවත් දෙන්නේත් නැහැ. විකුණන්නේවත් බදු දෙන්නේවත් නැහැ. ඒක අපේ පාලනය යටතේ තියෙනවා. මම හිතන්නේ වෘත්තීය සමිතිත් ඒක දන්නවා. අපි පැහැදිලිවම කියන්නේ අපි ඒ පිළිබඳව සාකච්ඡාවක්වත් කරලා නැහැ දෙනවා කියලා. ඒ නිසා ඒක ගැටලුවක් ඇතිවෙන්නේ නැහැ. වැඩ වර්ජනය කරන්න දෙයක් නැහැ. මට ඇවිත් කිව්වා නම් මම ඇත්තටම පැහැදිලි කරලා දෙනවා. මොකද කැබිනට් මණ්ඩලයේ ඉන්න වැඩි දෙනාගේ මම හිතන්නේ 99%ක් ඉන්නේ විකුණන්න ඕනේ නැහැ කියන පදනමේ. මේ දේපොළ විකුණන එක අපේ ප්‍රතිපත්තිය නෙමෙයි. ඒක එක්සත් ජාතික පක්ෂයේ ප්‍රතිපත්තිය. එක්සත් ජාකිත පක්ෂයේ ප්‍රතිපත්තිය ඉදිරියට ගෙන යන්න නෙමෙයි අපිට බලය දීලා තියෙන්නේ.'' යනුවෙන් වැඩිදුරටත් රාජපක්ෂ මහතා කරුණු දක්වයි.
මේ අතර මෙම වරායේ ඉදිරි සංවර්ධනය හා මෙහෙයුම් සම්බන්ධයෙන් සකස් කර තිබෙන වාර්තාව පිළිබඳ හෙට දින රැස්වන කැබිනට් මණ්ඩලයේදී සාකච්ජාවට ගැනීමට නියමිත බවද වාර්තා වෙනවා.
කෙසේවෙතත් ඊයේ දින මාධ්‍ය හමුවක් පවත්වමින් වරාය අධිකාරියේ සභාපති ජනරාල් දයා රත්නායක මහතා පැවසුවේ ඉතාම සුභවාදී ලෙස සියලු දෙනා බලාපොරොත්තු වූ ආකාරයට මෙම ප්‍රශ්නය විසඳෙන බව කිව හැකි බවයි.
මේ වන විට මෙම නැගෙනහිර පර්යන්තය ඉන්දියාවේ අදානි සමාගමට ලබා නොදෙන බවට වෘත්තීය සමිති රජයෙන් ලිඛිත සහතිකයක් ඉල්ලා සිටින අතර කොළඹ වරාය සේවකයින් ආරම්භ කර ඇති අකුරට වැඩ කිරිමේ වෘත්තිය සමිති ක්‍රියාමාර්ගයට ත්‍රිකුණාමල වරාය සේවකයින් ද සහය පළකරමින් ඔවුන්ද අකුරට වැඩ කිරීමේ වෘත්තිය සමිති ක්‍රියාමාර්ගයක් ආරම්භ කර ඇත.
