ඒ අනුව ඉදිරි දින කිහිපය තුල මෙම එන්නත පිළිබඳ තීරණය ඉංදියාවට දැනුම් දීම සිදු කෙරෙනු ඇති අතර ඒ අනුව ඉන්දියානු එන්නත මෙරටට ලබා ගැනීමේ කටයුතු සම්පාදනය වෙනු ඇති බවත් දැනගැනීමට ඇත.
ඖෂධ නියාමන අධිකාරියේ ප්‍රධාන විධායක වෛද්‍ය කමල් ජයසිංහ පවසා සිටින්නේ දින තුනක් වැනි කාලයකදී එම වාර්ථාව නිකුත් කළ හැකි බවය.
භූතානය, මාලදිවයින, බංග්ලාදේශය, නේපාලය, මියන්මාරය සහ සීෂෙල්ස් යන රටවලට ලබා දෙන ආධාර යටතේ එන්නත් සැපයීම ආරම්භ කරන බව ඉන්දියාව පසුගියදා නිවේදනය කළේය. නමුත් එන්නත් සැපයීම ආරම්භ කිරීම සඳහා ශ්‍රී ලංකාව, ඇෆ්ගනිස්ථානය සහ මොරිෂස් යන රටවල් වෙතින් අවශ්‍ය නියාමන අවසරය ඉන්දියාව බලාපොරොත්තුවෙන් සිටින බව ද වාර්තා විය. මෙම රටවලට ආනයනය කරනු ලබන එන්නත ඔක්ස්ෆර්ඩ්-ඇස්ට්‍රාසෙනෙකා මාස්ටර් බීජයෙන් ඉන්දියාවේ නිපදවන “කොවිඩ්ෂීල්ඩ්” එන්නත බවටද විදේශ මාධ්‍ය විසින් වාර්තා කර ඇති නමුත් මෙරට බලධාරීන් එය මෙතෙක් තහවුරු කර නැත.
“කොවිඩ්ෂීල්ඩ්” එන්නත අනුමත කිරීම සඳහා අවශ්‍ය ලියකියවිලි තවමත් ලැබී නොමැති බව වෛද්‍ය ජයසිංහ මහතා පවසයි.
