ඉන්දීය පාර්ලිමේන්තුවට විපක්ෂ නායකයෙක් නැහැ.

Thursday, 31 July 2014 10:05

ඉන්දීය පාර්ලිමේන්තුවේ විපක්ෂ නායකවරයා ඉදිරි දින දෙක ඇතුළත නම් කරන බව එරට පාර්ලිමේන්තුවේ කතානායකවරිය වන සුමිත‍්‍රා මහජන් පවසන්නීය.

ව්‍යවස්ථාමය ගැටළුවක් හේතුවෙන් ඉන්දීය පාර්ලිමේන්තුවේ විපක්ෂ නායකවරයා නම් කිරීම දිනෙන් දින ප‍්‍රමාද වෙමින් පවතී.
එරට ව්‍යවස්ථාවට අනුව පාර්ලිමේන්තුවේ ආසන 55 ක් ලබා ගන්නා පක්ෂයට විපක්ෂ නායක ධුරය සඳහා හිමිකම් කීමට අවස්ථාව හිමි වනු ඇත.

කෙසේ වෙතත්, විපක්ෂයේ වැඩිම මන්තී‍්‍ර ධුර සංඛ්‍යාවක් ලබාගත් කොංග‍්‍රස් පක්ෂයට පසුගිය මැතිවරණයෙන් ලබාගත හැකිවූයේ මන්තී‍්‍ර ධුර 44 ක් පමණි.

මේ වනවිටත් කොංග‍්‍රස් පක්ෂය විසින් විපක්ෂ නායක ධුරය සඳහා මල්ලිකාර්ජුන් කරාජ් නැමැති සිය ජ්‍යෙෂ්ඨ දේශපාලනඥයා නම්කර ඇත.
කෙසේ වෙතත්, ඉන්දීය කතානායකවරිය පවසන්නේ නීතිපති උපදෙස් ලබා ගැනීමෙන් පසු මෙම පත්කිරීම සිදුකරන්නේද නැද්ද යන්න පිළිබඳව ඉදිරි දින දෙක ඇතුළත ප‍්‍රකාශ කරන බවයි.

ඉන්දීය පාර්ලිමේන්තු ඉතිහාසයේ අවස්ථා කිහිපයකදීම විපක්ෂ නායකවරයෙකු නොමැතිව එරට පාර්ලිමේන්තුව කි‍්‍රයාත්මක වී තිබේ.