හමාස් සංවිධානයට එරෙහි මෙහෙයුම්වල දී ඊජිප්තුව කාර්යභාරයක් ඉටු නොකරන බවත්, එම සංවිධානය මෑත වසරවල ඊජිප්තුව සමග සහ ගාසා තීරයේ දේශසීමා මායිම්වල සාමය පවත්වාගෙන ඇති බවත් ඊජිප්තු ජනාධිපතිවරයා 7 වැනිදා ඇමරිකානු මධ්‍යම බුද්ධි ඒජන්සියේ ප්‍රධානි William Joseph Burns සමග සාකච්ඡාවක දී පැවසූ බව The Wall Street Journal පුවත්පත ඊජිප්තු උසස් නිලධාරියෙකුගේ ප්‍රකාශයක් උපුටා දක්වමින් සදහන් කර ඇත.

කෙසේවෙතත් ඇමරිකානු මධ්‍යම බුද්ධි ඒජන්සිය මේ සම්බන්ධයෙන් අදහස් දැක්වීම ප්‍රතික්ෂේප කර තිබේ.

මේ අතර උතුරු ගාසා තීරයේ සිවිල් ජනතාවට ඉවත්වී යාම සඳහා දෛනිකව පැය 4ක ප්‍රහාර නැවැත්වීමේ ක්‍රියාමාර්ගයකට ඊශ්‍රායලය එළඹෙනු ඇති බව අමෙරිකාව පවසයි.

අමෙරිකානු ජනාධිපති ජෝ බයිඩන් ප්‍රකාශ කළේ ඊශ්‍රායලය සමග සති කිහිපයක් පැවැත්වූ සාකච්ඡාවල ප්‍රතිඵලයක් ලෙස මෙම තීරණයට එළඹි බවය.
ඊයේ දිනයේ සිට ගාසා තීරයේ වැසියන්ට ඉවත්ව යාම සඳහා මානුෂිය කොරිඩෝ 02ක් හඳුන්වාදීමට ද නියමිතව තිබු බව ජෝ බයිඩන් ප්‍රකාශ කර ඇත.

සිය සාමාජිකයින් 99 දෙනෙකු ගාසා තීරයේදී ඝාතනයට ලක්වී ඇති බව එක්සත් ජාතීන්ගේ සංවිධානය පවසයි. පලස්තීන සරණාගතයින් සඳහා වන එක්සත් ජාතීන්ගේ ඒජන්සිය පවසන්නේ ගාසා තීරයේ පවතින තත්ත්වය අතිශයින්ම දරුණු බවය.

-P.M