එ් සටන දුෂ්කර නමුත් මේ වන තෙක් ජයග්‍රහණ එකින් එක ලබමින් තිබේ. ඒ ජයග්‍රහණයන් ආපසු හැර වීමට ඉඩ දිය යුතු නැත. ලබා ගත් ජයග්‍රහණය සමඟ ඉදිරියට යනව ද ? ජයග්‍රහණය පිළිනොගෙන ආපහු මුලටම යනවාද? මෙවර ජනාධිපතිවරණයේ දී තීරණය විය යුතුය.
ඊයේ දිනය වන අතිශයින්ම වැදගත් සුබ ආරංචියක් රට ලැබිණි. මේ වසර දෙකකට අධික කාලයක් තිස්සේ බලාපොරොත්තුවෙන් සිටි සහ ඒ වෙනුවෙන් දැඩි ජීවන අරගලයක යෙදෙමින් අති විශාල කැප කිරීමක් මේ රටේ පුරවැසියා සිදු කර තිබිණි. මේ නිසා මෙය ඔවුන්ගේම ජයග්‍රහණයකි. මෙය ජයග්‍රහණයක් යැයි කියන්නේ මේ ආදී හේතු රැසක් ඇතිවය.
ලංකාව ගැඹුරු ආර්ථික අර්බුදයකට ඇද වැ‍ටුණේ විදේශ ණය පිළිබඳ අර්බුදය නිසාය. ණය ගෙවා ගැනීමට තබා රටේ එදිනෙදා ආනයන වෙනුවෙන් වත් ඩොලර් ආදායමක් නොමැති තත්වය තුළ රට බංකොලොත් බව ප්‍රකාශයට පත් කිරීම සිදුවිය.
මේ අනුව රට හමුවේ තිබු අභියෝගය වූයේ මෙතැනින් ඉදිරියට අඩියක් හෝ තැබීමට නම් මේ ණය අර්බුදය විසඳා ගත යුතු වීමේ දුෂ්කර අභියෝගය ජය ගැනීමයි. ජාත්‍යන්තර මුල්‍ය අරමුදල වෙත යෑමට සිදු වන්නේ මේ ණය ප්‍රශ්නය විසඳා ගැනීම වෙනුවෙන් සහයෝගයක් අපේක්ෂාවෙනි.
ඒ අනුව ලැබුණු සහයෝගයත්, ඒ විශ්වාසනීය බැඳීමත් මත අද වන විට ශ්‍රී ලංකාව අපේක්ෂා කළ ජයග්‍රහණය අත් පත්කර ගෙන තිබේ. මේ වෙනුවෙන් ජාත්‍යන්තර මුල්‍ය අරමුදලේ නිර්දේශ පදනම් කරගෙන, වසරකට අධික කාලයක් සාකච්ඡා කරමින් ණය හිමි රටවල් 18 ක පමණ ප්‍රමාණයක් එක මතයකට එකඟකර ගැනීමට රජයට සිදු විය. ස්වෛරීත්ව බැඳුම්කර හිමියන් සමඟ ඊට වඩා සංකීර්ණ සාකච්ඡාවකට මැදි වීමට සිදු විය.
ඇතැමුන් ණය ප්‍රතිව්‍යුහගත කිරීමකට ණය හිමියන් එකඟ වීම හෑල්ලු කොට කතා කරන්නේ එහි ඇති වැදගත් කම නොදැන හෝ දේශපාලනික තක්කඩිකම නිසාය. මැතිවරණයක් මුව විට මෙවැනි ජයග්‍රහණයක් රටට ලැබීම බලයේ සිටින කණ්ඩායමට වාසිදායක තත්වයක් ඉබේම හට ගැනීම සිදුවේ. එ් අනුව විස්සෝපයට පත්ව සිටින විපක්ෂය මේ ජයග්‍රහණය සැමරීමට අකමැති වීම ස්වභාවික කුහක කමකි. කෙසේ නමුත් හර්ෂ දි සිල්වා වැනි අය ජයග්‍රහණය අගය කිරීම කර තිබිණි. මන්ද ණය ප්‍රතිවුහගත කරණයෙහි දැඩි අවශ්‍ය‍තාවය ඔහු දැන ගෙන සිටීමට තරම් දැනුමක් ඔහුට තිබු නිසාය.
කොහොම නමුත් ණය ප්‍රතිව්‍යුහගත කිරීම නිසා මෙරට විසින් ගෙවීමට නියමිතව තිබු ණය කන්දරාවෙන් සියයට 40.3 ක් එනම් 2023 වසර අවසන් වන විට පැවති මෙරට අමෙරිකානු ඩොලර් බිලියන 17.5ක (කෝටි 1750ක) පමණ විදේශීය වාණිජ ණය ප්‍රමාණයකට මෙම සහනය හිමිවේ.
මේ අනුව ගෙවීමට ඇති ඩොලර් බිලියන ගනනක ණය අඩු වීමෙන් වන බර සැහැල්ලු වීමේ තරම පැහැදිලිය. එමෙන්ම ණය ආපසු ගෙවීමේ කාලයද දීර්ග කරගෙන ඇත. ගෙවිය යුතු වාරිකයේ වටිනාකම් ප්‍රමාණද පොලී ගෙවීම්වල ද අමතර අඩු කිරීමක් කරගෙන තිබේ. මේ අනුව මෙරට ආර්ථිකයට තිබුණු පීඩනය දැවැන්ත පරිමාණයකින් අවම කරගෙන ඇත.
මේ ලැබුණු සහනය දැන් රට නැවත ගොඩනැංවීම වෙනුවෙන් රටට දැරිය හැකි ශක්ති ප්‍රමාණය වැඩි වී ඇත. රට නැවත ජවසම්පන්න වී ඇත. දැන් අවශ්‍ය වන්නේ මේ සුබවාදී තත්වයන් යොදාගෙන සැලසුම් කර තිබෙන ආර්ථික වැඩ පිළිවෙල අනුව වේගයෙන් වඩාත් සාර්ථකව එම කටයුත්තෙහි යෙදීමය.
මේ වෙද්දි රටේ සංවර්ධනය වෙනුවෙන් වන මාර්ග සිතියම සකස් කර ඇත. යා යුතු මාර්ගය පැහැදිලිව ඇත. රටට අරමුණක් ඉලක්කයක් ඇත. අධිෂ්ඨානයක් විශ්වාසයක් ඇත. ඊටම ඔබින පරිණත නායකත්වයක් ඇත. ඒ අනුව දැන් ගමන් ආරම්භ කළ යුතුය. ආපසු හැරීමක් නොවිය යුතුය. තවත් පිස්සු කෙලීම් වලට ඉඩක් නොතැබිය යුතුය.
හෙට දිනයේදී ඡන්දය පාවිච්චි කිරීමේ දී වඩා තීරණත්ම කාරණය වන්නේ මේ අවබෝධය සහිතව එය සිදු කිරීමය. වරද්දා ගත්තොත් එය මෙම මැතිවරණයේ හුදු ප්‍රතිපලයක් පමණක් වන්නෙ නැත. මන්ද එය දශක ගනනාවක් අපේ දුවා දරුවන්ටත් අනේක විධ දුක් විඳින්න වන තත්වයක් වන නිසාය. ඔවුන්ගේ ජීවිත විනාස කිරීමක් වන නිසාය. එය දැන දැනම ඡන්දය වරද්දා ගැනීම, තමන්ගේ දරුවන්ට වස පොවා මිය යන තෙක් බලා සිටීමක්ම වේ.
