සහල් වෙළෙඳාමේ අසාමාන්‍ය මිලක් මෙකල ඇතැම් වෙළෙඳසල් ඇසුරෙන් දක්නට ලැබේ. ඇති තතු දන්නා කාටත් එය මවිතයට කරුණකි.
බොහෝ විට අධික මිලක් ගෙන ඇත්තේ ගොවියාගෙන් වී කිලෝවක් රුපියල් 100 -110ක් පමණ ගණනකට මිලට ගත් තත්ත්වයක් යටතේය. ඉන්ධන මිල ඉහළ යෑම් ආදියේ යම් බලපෑමක් තිබුණ ද මෙතරම් ඉහළ මිලක් පාරිභෝගිකයාගෙන් අය කිරීම අසාධාරණ බව සමාජ විශ්ලේෂකයන්ගෙන් ඇසේ.
එපමණක් නොව, 2015 වර්ෂයෙන් පසුව මෙරට වැඩිම වී අස්වැන්නට උරුමකම් කීමට මෙරටට මේ වසර මුලදී හැකියාව ලැබිණ. ඒ අනුව රජයේ මැදිහත් වීමෙන් ඉකුත් සිංහල හා හින්දු අලුත් අවුරුදු සමයේදී ඇරඹිණි. ඒ අනුව සතොස සහ සමුපකාර සංගම්වලට වී අලෙවි මණ්ඩලයේ වී තොග රුපියල් 140ක් තරම් අඩු මිලකට අලෙවි කෙරිණි. වී සහල් බවට පෙරළා 145ක් තරම් මිලකට මහජනතාවගේ පරිභෝජනය පිණිස සහන මිලට අලෙවි කෙරිණි. වී අලෙවි මණ්ඩලයේ වැදගත්කම ඉන් මනාව වැටහේ.
ඒ කෙසේ වුවද, මේ වන විට ඇතැම් වෙළෙඳසල්වල උදෑසන දක්නට ලැබෙන මිල සවස් වන විට වෙනස් වී ඇත. අදහා ගත නොහැකි තරම් වැඩි වීමක් එකම දිනක් තුළදී වුවද දක්නට ලැබෙති.
මේ වන විට අත්‍යවශ්‍ය සේවා කොමසාරිස් ජනරාල්වරයාගේ ඉල්ලීමට අනුව ඉන් ඉතිරි වී තොගය වන මෙට්‍රික් ටොන් 43,000 ක් පමණ සහන මිලට නැවත මහජනතාව වෙත සතොස සහ සමුපකාර සංගම් හරහා අලෙවි කිරීමට වී අලෙවි මණ්ඩලය කටයුතු කරයි. මේ වන විට එය ක්‍රියාත්මකය. ඊට අඩු අගයකින් ජනතාව ආර්ථික අපහසුතාවලින් පෙළෙන මේ අවස්ථාවේදී අඩු මිලට සහල් සැපයීමට රජය මැදිහත් වී ඇත.
මේ අනුව කැකුළු වී තොග වී අලෙවි මණ්ඩලීය තොග ගබඩාවලින් රුපියල් 192කට සුළු හා මධ්‍ය පරිමාණ මෝල් හිමියන්ට මෙන්ම සමුපකාර සංගම් ආදියට ද සපයා දෙයි. ඉනික්බිතිව එම තොග සහල් කිරීමෙන් පසුව ප්‍රශස්ත ලාභයක් ද ඇතිව ජනතාවට 197ක මිලට සතොස හා සමුපකාර හරහා අලෙවි කිරීමට ද කටයුතු කර තිබේ.
නාඩු වී පිළිබඳ තත්ත්වය ද එසේමය. වී අලෙවි මණ්ඩලය නාඩු වී සමුපකාර සංගම් ආදියට මේ වන විට රුපියල් 194කට සපයා දෙයි. ඒ අනුව එම සංගම්, සතොස ආයතන නාඩු රුපියල් 199කට වෙළෙඳපොළේ අලෙවි කරයි. සම්බා සහ කීරි සම්බා පරිභෝජනය බස්නාහිර පළාත තුළ ඉතා වැඩි බව පර්යේෂණාත්මකව හෙළිකර ගෙන තිබේ. ඒ අනුව සම්බා වී අලෙවි මණ්ඩලයෙන් වී වශයෙන් රුපියල් 205ට මිල දී ගන්නා සමුපකාර සංගම් ආදියෙන් මේ වන විට රුපියල් 210කට අලෙවි කෙරේ. කීරි සම්බා වී රුපියල් 200ට ද වෙළෙඳපොළේ එම සහල් 215ට පමණ අලෙවි කෙරෙන්නේත් රජය, වී අලෙවි මණ්ඩලය හරහා රජය ජනතාවට සහන සලසමිනි. කෘෂිකර්ම අමාත්‍යංශයේ දත්ත අනුව සැලකිය යුතු වගා බිම් ප්‍රමාණයක වැඩ අරඹා ඇත. ගොවීන්ගේ ඉල්ලීමට අනුව ලබන මස මුලදී ඉන්දියාවෙන් යූරියා ඇතුළු රසායනික පොහොර ආනයනයට කටයුතු කරන බවට කෘෂිකර්ම ඇමැතිවරයා ඇතුළු රජය සහතික වෙයි. දෙපාර්ශ්වය ඒ වගට ගිවිසුම්ගත වී ඇත. දේශීය සහල් සඳහා පාලන මිලක් ද මේ වන විට ක්‍රියාත්මකය. රජය දැඩිව එය අනුගමනය කිරීමට තීරණය කර ඇත. පාරිභෝගික කටයුතු අධිකාරිය ඇතුළු බලධාරිහු නිතර ඒ පිළිබඳ සෙවිල්ලෙන් සිටිති. ජනතාව ආර්ථික අපහසුතාවලින් පෙළෙන මේ අවස්ථාවේදී අඩු මිලට සහල් සැපයීමට රජය මැදිහත් වී තිබීම පැසසුමට ලක් කළ යුතුය..
එසේම කීමට ඇත්තේ සහල් තොග සැඟවීමේ ජාවාරම දෙස බැලීමේදී එය නිරර්ථක කාර්යයක් වනු නියතය. කූට වෙළදුන්දැන ගත යුත්තේ තෙල් සගවමින් කරන ලබන ක්‍රියාව සහල් සදහා කල නොහැකි බවය. උපරිම වශයෙන් දෙමසක් වුව සහල් කල් තබා ගත නොහැකිය. අවසානයේ සිදු වන්නේ සහල් ඉවත දැමීමටය..එය ජාතික අපරාධයකි.
-මහේෂි
