මොනවද 23 වැනිදා කෙරෙන්නේ?
ලෝරන්ස්‌ගේ මනමාලි ඉදිරිපත් කරන්නේ තර්ඩ් බෙල්ට්‌ තියටර් ප්‍රඩක්‌ෂන් ආයතනයෙන්. නාට්‍යයේ මංගල දැක්‌ම පැවැත්වුණේ පසුගිය අගෝස්‌තු 1 දා මේ වනවිට මාස 6 ක්‌ ගතවෙලා. පනස්‌වැනි දර්ශනය පසුගියදා ලයනල් වෙන්ට්‌ඩ් රඟහලේදී සිදුකළා. මුල සිටම අපේ සැලසුමක්‌ තිබුණා පනස්‌වැනි දර්ශනයේදී විශේෂ දෙයක් කරන්න. ඒ අනුව අපි සඳුදාට අපේ රටේ නාට්‍ය කලාව උදෙසා සේවය කරන සහ සේවය කළ ප්‍රවීණයන් හතර දෙනෙකුට උපහාර පුද කරනවා.
කව්ද මේ ප්‍රවීණයන්?
සෝමලතා සුබසිංහ මහත්මිය, අයිරාංගනී සේරසිංහ මහත්මිය, ධර්මසිරි බණ්‌ඩාරනායක මහතා සහ තිස්‌ස ගුණවර්ධන මහතා. ඔවුන් නාට්‍ය කලාවට දැනටත් සක්‍රියව දායකවී සිsනවා. ඔවුන් හතර දෙනාම අද වන විට ජීවත්ව සිටින නාට්‍ය කලාවේ ජ්‍යෙෂ්ඨයන්.
උපහාර උළෙල පවත්වන ස්‌ථානය
බොරැල්ල නාමෙල් මාලනී පුංචි තියටරයේ. උදේ 10.00 ට එදාට ලෝරන්ස්‌ගේ මනමාලි වේදිකා ගත කරන්නේ නෑ. මේ උළෙලට නම තබා තිබෙන්නේ "උත්තරීතර උපහාර උළෙල" ලෙස නාට්‍යයේ සංගීත අධ්‍යක්‍ෂ ප්‍රදීප් ජයතිලකගේ විශේෂ සංගීත වැඩසටහනකA උළෙලට ඇතුළත්. ඉරිදා දිවයින පත්‍රයේ උපදේශක කර්තෘ ගාමිණී සුමනසේකර මහතා "කාලය සහ කලාකරුවන්ගේ දේශපාලන කාර්ය භාරය කෙසේ විය යුතුද" යන මැයෙන් ප්‍රධාන දේශනය පවත්වනවා. එය කාලීන මාතෘකාවක්‌.
උළෙලේ සහභාගීත්වය?
විශේෂ ආරාධිත අමුත්තෙක්‌ නෑ. ශ්‍රී ලංකාවේ සියලුම මාධ්‍ය ආයතනවලට ආරාධනා කර තිබෙනවා. නාට්‍ය කණ්‌ඩායමේ සාමාජිකයන් සහභාගී වෙනවා. "ලෝරන්ස්‌ගේ මනමාලි" තිරෙන් පිටුපස නිර්මාණ දායකත්වය දැක්‌වූ සංගීත අධ්‍යක්‍ෂ ප්‍රදීප් ජයතිලක, ගී පද රචනා කළ තනු- අනවරත්න, ආලෝකකරණය කළ පාලිත පෙරේරා, වේදිකා පසුතල ශිල්පී ලාල් හරින්ද්‍රනාත් යන අයට ඇගයීමේ සම්මාන පුද කිරීමටත් මේ උළෙලේදී සිදුවෙනවා. රංගනයෙන් දායක වූ අයට පසුගියදා පනස්‌වැනි දර්ශනය අවස්‌ථාවේදී ඇගයුමට ලක්‌ කළා. ඒ වගේම දර්ශන වාර පනහක්‌ මේ වන විට සංවිධානය කළ සියලුම සංවිධායකයින්ට මේ සෞන්දර්යාත්මක ගනුදෙනුවට අප සමග එක්‌වූ සියලුම ප්‍රේක්‍ෂකයන්ට වගේම විද්යුත් හා මුද්‍රිත මාධ්‍යවලටත් තර්ඩ් භෙල්ට්‌ තියටර් ප්‍රඩක්‍ෂන්හි දුලිකා මාරපන, ප්‍රවීන් කුලසිංහ, ජානක සිරිවර්ධන සමග මා ස්‌තුතිය පුද කරනවා.
දිවයින
