මේ වන විට විපක්ෂ නායක ධුරය දරන ශ්‍රී ලනිපයේ මන්ත්‍රීවරු ගනනාවක් ආණ්ඩුවේ ඇමැතිකම් දැරීමත් එම පක්ෂයේ නායකයා ජනාධිපතිවරයා වන නිසාත් එම පක්ෂයට විපක්ෂ නායක ධුරය ලැබීමේ සදාචාරාත්මක අයිතියක් නොමැති බව දේශපාලන විචාරකයන්ගේ මතය වේ. ශ්‍රී ලංකා මුස්ලිම් කොන්ග්‍රසයද ආණ්ඩුවේ කොටස්කාර පක්ෂයක් වේ.
කෙසේ නමුත් විපක්ෂයේ දේශපාලන පක්ෂ අතරින් වැඩිම මන්ත්‍රීධුර (15) සංඛ්‍යාවක් හිමි පක්ෂය වන්නේ දෙමළ ජාතික සන්ධානයයි. එමෙන්ම එහි නායක සම්බන්ධන් මහතා පාර්ලිමේන්තුවේ සිටින ජේෂ්ඨතම හා කෘතහස්ත දේශපාලඥයකු වන අතර ප්‍රජාතන්ත්‍රවාදය වෙනුවෙන් පෙනී සිටින්නකු ලෙස ප්‍රකටය. සිංහල දෙමළ හා ඉංග්‍රීසී භාෂා ත්‍රිත්වයෙන්ම කතා කිරීම හැකියාව ඇති ඒ මහතා ඒකීය රාජ්‍යයක් වෙනුවෙන් පෙනී සිටින්නකු වන අතර ජාත්‍යන්තර වශයෙන්ද ඉහළ පිළිගැනීමක් සහිත නායකයකුද වේ.
මුස්ලිම් කොන්ග්‍රසයේ ලේකම් හන් අලී මහතා පවසන්නේ මෙරට දේශපාලනය හා සමාජ කටයුතු සම්බන්ධයෙන් ඉහළ අවබෝධයක් සහිත සම්බන්ධන් මහතා විපක්ෂ නායක ධුරයට පත් වියයුතු සුදුසුම කෙනා බවය. මේවන විට වෙනත් කුඩා විපක්ෂ කණ්ඩායම් විසින් මහජන එක්සත් පෙරමුණේ නායක දිනේෂ් ගුණවර්ධන මහතා විපක්ෂ නායක ධුරයට සුදුසු බව යෝජනා කර තිබුණත් ඔහුගේ පක්ෂයට ඇත්තේ මන්ත්‍රී ආසන තුනක් පමණි.
එමෙන්ම දෙමළ ජාතිකයකු විපක්ෂ නායක ධුරයට පත් නොවිය යුතු බවට මහින්ද රාජපක්ෂ මහතට සහය දක්වන කොටස් විසින් ප්‍රබල ප්‍රචාර්යක්ද ගෙන යමින් තිබේ. කෙසේ නමුත් මීට පෙර 1977 මහමැතිවරණයෙන් පසුව පාර්ලිමේන්තුවේ විපක්ෂ නායක ධුරය හෙබවූයේ උතුරු පළාතේ දෙමළ ජනයා (කන්කසන්තුරේ) නියෝජනය කරමින් පැමිණි දෙමළ ජාතික මන්ත්‍රීවරයකු වූ දෙමළ එක්සත් විමුක්ති පෙරමුණේ නායක ඒ. අමිර්තලිංගම් මහතාය. ඔහු එල්ටීටීඊ සංවිධානය විසින් පසුව(1989) ඝාතනය කරනු ලැබීය.
