අලුත් අවුරුද්ද කියන්නෙ ලෝකෙ විවිධ රටවල් සමරන්නෙ වෙනස් විදියට. අපි අලුත් අවුරුද්ද සමරන්නේ අප්‍රේල් මාසේ. නමුත් චීන්නු අලුත් අවුරුද්ද සමරන්නෙ පෙබරවාරි මාසයේදී. ඇත්තටම මේක වසන්ත උත්සවය කිව්වොත් හරියටම හරි.

මේ වසන්ත සැණකෙළිය චීනයේ පවත්වන වැදගත්ම හා දැවැන්තම පාරම්පරික උත්සවය. චීන දින දර්ශනයට අනුව 2015 වර්ෂය ඇරඹෙන්නේ පෙබරවාරි මස 19 වනදා සිටයි. නව වසර උදාවෙන දිනය අවුරුද්දෙන් අවුරද්ද වෙනස් වෙනවා. එය තීරණය කෙරෙන්නේ චීන චන්ද්‍ර දින දර්ශනයට අනුව. මෙම දින දර්ශනයේ විවිධ රාශි ඇතුලත් වෙනවා. ඒ අනුව 2015 වර්ෂය නම් කෙරෙන්නෙ එළුවාගේ වසර ලෙසයි.

චීන අලුත් අවුරුද්ද සැමරීම සඳහා දින 8ක පමණ දීර්ඝ නිවාඩුවක් ලැබෙනවා.

අලුත් අවුරුදු සැමරීමේදී පවුලේ සියලු දෙනා එකට එකතුවීම සිරිතක්. අලුත් අවුරුදු දවසේ පවත්වන රාත්‍රී භෝජන සංග්‍රහය හඳුන් වන්නේ නැවත එකතු වීමේ භෝජන සංග්‍රහය යන තේරුමින් Reunion Dinner නමින්. මේ භෝජන සංග්‍රහයේදී පවුලේ සියලු දෙනා මේසය වටා වාඩිවී එකට කෑම ගනු ලබනවා.

ඉතිහාසය
මේ අලුත් අවුරුදු සැමරීමට වසර 40000ක් පමණ අතීතයක් තියෙනවා. මෙහිදී විශ්වාසය වන්නේ සෑම වසරකදීම දෙවියන් සතුටු කළ යුතු බවයි. මේ වසරේදී කිසිදු කරදරයකින් තොරව තමන්ගේ අස්වනු සරුසාර කොට දෙන ලෙස ඉල්ලා දෙවියන් සතුටු කිරීම සිදුවෙනවා.

සංස්කෘතික අංග
විවිධ විදියේ සංස්කෘතික අංග පැවැත්වෙනවා. ඒ අතරට ගිනි කෙළි සංදර්ශන, මුතුන් මිත්තන් වන්දනා කිරීම, මකර නැටුම්, සිංහ නැටුම් ඇතුලත් වෙනවා. ඒ වගේම වසරේ වෙන කාලවලදී දක්නට නොලැබෙන සර්ප නැටුම් පවා මෙහිදී දක්නට ලැබෙනවා.

ඒ වගේම උතුරු චීනය ආශ්‍රිතව the Rice Sprout Song නම් ගීත විශේෂයක් ගයමින් නර්තනයේ යෙදීම සිරිතක්.

ආහාර
චීන අලුත් අවුරුදු උත්සවයේදී ආහාර පාන සඳහා හිමි වන්නේ සුවිශේෂී ස්ථානයක්. අලුත් අවුරුද්දේ සාදන සියලුම ආහාර වර්ග මගින් විවිධ දේ සංකේතවත් කරනවා. උදාහරණයක් ලෙස අලුත් අවුරුද්දේ දී මාළු පිස ගැනීම අනිවාර්ය සිරිතක්. මාළු පිස ගැනීමට හේතුව වශයෙන් සඳහන් වන්නේ මාළු යන චීන වචනයෙන් අතිරික්තය යන තේරුමක් ලබා දීමයි. මේ නිසා නව වසරේ මුදල් හා අස්වැන්න අතිරික්තයක් පතා මාළු ආහාරයට ගනු ලබනවා.

සැරසිළි
වීථි, නිවාස, ගොඩනැගිලි රතු පැහැයෙන් යුතු සරසිලි වලින් අලංකාර කිරීම සිරිතක් ලෙස සිදු වෙනවා. මෙම පැහැයෙන් සැරසීමට හේතුව වන්නේ රතු පැහැය සුභ වර්ණයක් ලෙස සැළකීමයි. සාමාන්‍යයෙන් නගරයේ විථි සරසන්නේ රතු පැහැති වෙසක් කූඩු වැනි සැරසිළි විශේෂයකින්. ඒ වගේම නිවාස හා කාර්යාල විවිධ වැකි ලියූ රතු පැහැති සැරසිලි වලින් අලංකාර වෙනවා. බැංකු වැනි විශාල ව්‍යාපාරික ස්ථාන සරුසාර බව පෙන්වන පින්තූර වලින් අලංකාර කිරීම සිරිතක්. ඒ විතරක් නෙමේ මේ වසර එළුවාගේ වසර නිසා එළුවා යොදාගනිමින් සෑදූ සෙල්ලම් බඩු හා විවිධ සැරසිළි දකින්න ලැබීම තවත් විශේෂත්වයක්.

තෑගි දීම
අවුරුද්දේ පවතින තවත් විශේෂ අංගයක් තමයි තෑගි හුවමාරු කර ගැනීම. මේ තෑගි හුවමාරු වෙන්නෙ රතු පැහැති ලියුම් කවරවල දමායි. බොහෝ විට මේ ලියුම් කවරව බහා හුවමාරු වෙන්නෙ මුදල්. හැබැයි මේ තෑගී ලබාදෙන්නේ ළමයින් සහ වයස්ගත පුද්ගලයන් සඳහා පමණයි.

ලෝකෙ අනිත් පාරම්පරික උත්සව වගේම චීන අලුත් අවුරුදු උත්සවයටත් නවීකරණය වෙලා. අලුත් අවුරුදු දවස් ටිකේ හැම ප්‍රවාහන මාධ්‍යක්ම ජනයාගෙන් පිරී යනවා. මේකට හේතුව විවිධ නගරවල කාර්ය බහුල ජීවිත ගතකරන චීන්නු අලුත් අවුරුද්දේදී තමන්ගෙ මුල් ගම් බිම් වලට යන්න දක්වන්නෙ ඉතා ලොකු උනන්දුවක්.
ඒත් එක්කම චීන ජනතාව විශ්වාස කරන විදියට තරුණියක් වයස අවුරුදු 30 සම්පුර්ණ වීමට පෙර සහ තරුණයෙක් වයස අවුරුදු 32 පසුවීමට පෙර විවාහ විය යුතුයි. මේ නිසා අලුත් අවුරුද්දට නිවසට පැමිණෙන විවාහ නොවූ තරුණ තරුණියන් සඳහා මංගල යෝජනා ගෙන ඒමත් මේ අලුත් අවුරුදු සමයේ සිදු වෙන දෙයක්. දෙමව්පියන් දක්වන මේ උනන්දුව නිසාම අද කාළේ තරුණියන් පෙම්වතුන් හා පෙම්වතියන් කුලියට ගැනීමට පෙළඹී සිටිනවා. පෙම්වතුන් සපයා දීම සඳහා ඕනෑ තරම් ආයතන සහ අන්තර් ජාල සේවා සැපයෙනවා.

ඒ විතරක් නෙමේ දැන් තරුණ තරුණියන් ජංගම දුරකථන හරහා සුභ පැතුම් හුවමාරු කර ගැනීමද සිරිතක් ලෙස සිද්ධ වෙනවා.