අපිට නැතත් ලෝකෙ ගොඩක් රටවල් අලුත් අවුරුද්ද උදාවීම ලෙස පිළිගන්නෙ ජනවාරි පළමුවෙනිදා. නමුත් මේ රටවල් තමන්ගෙ නව වසර පිළිගන්න විදිය එකිනෙකට වෙනස්.
ඩෙන්මාර්ක්
ඩෙන්මාර්ක ජාතිකයින් නව වසරක් පිළිගන්නේ සිය අසල්වැසියන්ගේ නිවෙස් ඉදිරිපසට පිඟන්වලින් දමා ගැසීමෙනි. අලුත් අවුරුද්දක් උදා වන විට තම නිවෙස ඉදිරිපිට බිඳී ගිය පිඟන් කටු කැබලි ගොඩ ගැසී තිබිම වාසනාවේ සංකේතයක් බව ඩෙන්මාර්ක් වැසියන්ගේ විශ්වාසය වන අතර එලෙස වැඩිම පිඟන් කටු තොගයකට හිමිකම් කියන්නා ඉතා වාසනාවන්ත පුද්ගලයෙකු ලෙස සැලකේ. ඒ ඔහුට වාසනාව පතන මිතුරන් බොහොමයක් සිටින බව ඉන් ඇඟවෙන නිසයි.
ග්‍රීසිය
ග්‍රීසියේ “පොතාරිකෝ” ලෙස හැඳින්වෙන සම්ප්‍රදායට අනුව උදා වූ වසර වාසනාවන්ත වීම සඳහා අලුත් අවුරුදු දිනයේදී නිවසට මුලින්ම ඇතුළු වන තැනැත්තා යහපත් ගති පැවතුම්වලින් යුතු අයෙකු විම අත්‍යාවශ්‍යයි. මේ නිසා එලෙස නිවසට පළමුවෙන්ම ඇතුළු වන තැනැත්තා ලෙස ග්‍රීක වැසියන් බොහෝවිට තෝරා ගන්නේ ළමුන්ය. ඒ වැඩිහිටියන්ට සාපේක්ෂව ළමුන් අහිංසක බවට වන පිළිගැනීම නිසාය. එලෙස තෝරා ගත් “වාසනාවේ දූතයා” සිය දකුණු පාදය පෙරට තබා නිවසට ඇතුළුව නිවැසියන්ට සතුට හා සෞභාග්‍ය පතමින් ඉදුණු දෙලුම් ගෙඩියක් පයෙන් පෑගිය යුතුය.
ජර්මනිය
නව වසරක් උදාවද්දී ජර්මානු වැසියන් අනිවාර්යයෙන් නරඹන ඉංග්‍රිසි ප්‍රහසන රූපවාහිනි වැඩසටහනක් වෙයි. මිනිත්තු එකොළහක කාලයකට සීමාවූ "Dinner for One." නැමැති මෙම වැඩසටහන ලොව වැඩිම වාර ගණනක් නැවත නැවත විකාශය කෙරුණු වැඩසටහන ලෙස ප්‍රසිද්ධියක් ඉසිලුවද ඇමෙරිකාවේ හෝ එක්සත් රාජධානියේ එය එතරම් ප්‍රකට වුවක් නොවේ. අනූ හැවිරිදි මිස් සොෆි තම උපන් දිනය සමරමින් සිය මිය ගිය මිතුරු මිතුරියන් වෙනුවෙන් කෑම මේසයක් පිළියෙළ කරන අයුරු මින් රඟ දැක්වේ.
ස්පාඤ්ඤය
ස්පාඤ්ඤ වැසියන් නව වසර පිළිගන්නේ වාසනාව පතමින් මිදි ගෙඩි දොළහක් ආහාරයට ගනිමිනි. අලුත් අවුරුදු උදාවට ඉතිරිව ඇති අවසන් මිනිත්තු දොළහ ගනිමින් නාද කෙරෙන සීනු නාදයත් සමග මෙම මිදි ආහාරයට ගැනීම සිදු වේ.
ස්පාඤ්ඤය හා ඉතාලිය
මේ රටවල් දෙකේ තවත් අමුතු ආකාරයේ සම්ප්‍රදායක් තියනවා. ඒ තමයි අලුත් අවුරුද්දෙදි පිරිමින් රතු පැහැති කාන්තා යට ඇඳුමකින් සැරසීම. මින් බලාපොරොත්තු වෙන්නෙ නව වසරේ වාසනාවයි.
ෆින්ලන්තය
අලුත් අවුරුද්ද උදා වීමට පෙර දින රාත්‍රියේදී ඉවත දැමූ ටින් ලෝහ කැබැල්ලක් සොයා ගන්නා ෆින්ලන්ත වැසියන් එය උණු කර අශ්ව ලාඩමක හැඩයකට වත් කොට (අච්චුවකට නොවේ) එය ජලයට හෙළති. එවිට උණු කළ ටින් ද්‍රාවණය යළිත් දැඩි බවට පත් වන අතර ඉන් මතුවන හැඩය ඔවුන් එළැඹෙන වසර පිළිබඳ අනාවැකි පැවසීමට යොදා ගන්නෝය. හදවතක හෝ මුදුවක හැඩැති ටින් කැබැල්ලක් ලැබුණේ නම් විවාහය පිළිබඳවත්, නැවක හැඩයකින් සංචාරයක් පිළිබඳවත්, සත්වයෙකුගේ හැඩයකින් සෞභාග්‍යය පිළිබඳවත් අනාවැකි පැවසෙන බව ෆින්ලන්ත වැසියන්ගේ විශ්වාසයයි.
පැනමාව
පැනමා වැසියන් අලුත් අවුරුද්ද පිළිගන්නේ අපූරු ආකාරයකටය. සාමාන්‍යයෙන් වසරේ අවසාන කාලයේදී ඔවුන්ගේ ගෙවතුවල ඉදිරිපස “මුනෙකෝ” ලෙස හැඳින්වෙන පඹයන් ඉදි කර තිබිම සුලබ දසුනකි. මෙම පඹයන් නිර්මාණය වන්නේ පැනමාවාසීන් එළැඹෙන වසරේදී දකින්නට නොලැබේවායි පතන දේශපාලනඥයින් වැනි රටේ ප්‍රකට පුද්ගලයන් නිරූපණය වන ලෙසයි. නව වසර උදාවට පෙර දින රාත්‍රියේදී එලෙස පතමින්ම මෙම පඹයන් පුලුස්සනු ලැබේ.
බෙලරුස්
බෙලරුස් රාජ්‍යයේ අවිවාහක තරුණියන්ට අලුත් අවුරුද්දක් යනු විවාහය පිළිබඳ නව බලාපොරොත්තු ඇති කරන්නකි. නව වසර උදා වීමට පෙර දින රාත්‍රියේදී තනිකඩ යුවතියන් එක්ව එකිනෙකා ඉදිරියේ බඩඉරිඟු ඇට ගොඩ බැගින් පිළියෙළ කරන අතර ඒ අවසානයේදී කුකුළෙකු ඒ මැදින් ඇවිදීමට සලස්වයි. කුකුළා මුලින්ම ඉරිඟු ආහාරයට ගැනීමට තෝරා ගන්නා ගොඩ අයත් යුවතිය එම වසරේදී මුලින්ම විවාහ වන තැනැත්තිය බවට විශ්වාසයක් බෙලරුස් ජාතිකයින් අතර වේ. මොවුන්ගේ තවත් චාරිත්‍රයකදී විවාහාපේක්ෂිත තරුණියන් කැඩපත් දෙකක් අතර සිටුවන අතර එම කැඩපත් නිසි ලෙස ස්ථානගතව තිබේ නම් තමා විවාහ වන තරුණයාව දැක ගැනීමට තරුණියට හැකි වන බව කියැවේ.
ඇමෙරිකාව හා කැනඩාව
දෙසැම්බර් 31 දා මධ්‍යම රාත්‍රියේදී ඇමෙරිකානුවන් හා කැනේඩියානුවන් කණ්ඩායම් වශයෙන් එක්ව හිම මිදෙන ශිතලෙන් යුතු ජලාශ හා ගංගාවල කිමිදෙන්නේද එළැඹෙන වසර වාසනාවන්ත කර ගැනීමේ ප්‍රාර්ථනය සිත ඇතිවය.
මෙක්සිකෝව
සංචාරයට හා වික්‍රමයන්ට ප්‍රිය කරන මෙක්සිකානුවන් අලුත් අවුරුද්ද පිළිගන්නේ ගමන් මල්ලක් අතැතිව තමා වෙසෙන නිවස වටා ගමන් කරමිනි. හිස් ගමන් මල්ලක් වුවද ප්‍රමාණවත් වන අතර එලෙස කිරීමෙන් එළැඹෙන වසරේදී සංචාරය කිරීමට වැඩියෙන් අවස්ථා හිමි වනු ඇති බව මෙක්සිකානුවන්ගේ විශ්වාසයයි.
දකුණු අප්‍රිකාව
දකුණු අප්‍රිකානු වැසියන් අතර අපූරු ආකාරයේ සම්ප්‍රදායක් තියනවා. ඒ තමයි දෙසැම්බර් 31 වෙනදට මයික්‍රොවේව් උදුනක් ජනේලයෙන් පිටතට විසි කරල තමයි ඔවුන් අලුත් අවුරුද්ද සමරන්නෙ. වාර්තා වෙන විදියට මේ අපූරු ආකාරයේ චාරිත්‍රය නවත්තන්න පොලිසියෙන් පවා යොදවන්න සිද්ධ වෙනවලු.
