එළැඹෙන 06 වනදා එජපයේ පක්ෂ සම්මේලනයද පැවැත්වීමට නියමිත අතර එහිදී හිටපු ජනාධිපතිවරයා විසින් මෙම ප්‍රකාශය සිදුකරන ඇති බව වාර්තා වෙයි.
පොදු දේපළ පනත යටතේ රක්ෂිත බන්ධනාගාර ගත කර සිටින හිටපු ජනාධිපති රනිල් වික්‍රමසිංහ මහතා පසුගිය 26 වනදා ඇපමත මුදා හැරියේය.
හිටපු ජනාධිපතිවරයා සම්බන්ධයෙන් ඉදිරිපත් වූ වෛද්‍ය වාර්තා සලකා බැලීමෙන් අනතුරුව කොටුව මහේස්ත්‍රාත් නිලුපුලී ලංකාපුර මෙනෙවිය මෙම නියෝගය නිකුත් කළාය.
ඒ අනුව අපරාධ පරීක්ෂණ දෙපාර්තමේන්තුව සහ විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුව හිටපු ජනාධිපතිවරයා රුපියල් ලක්ෂ 50 බැගින් වු ශරීර ඇප තුනක් මත මුදාහරීමට මහේස්ත්‍රාත්වරිය නියෝග කර තිබුණි.
කෙසේ නමුත් රනිල් වික්‍රමසිංහ මහතා අත්අඩංගුවට ගැනීම දේශපාලන පළිගැනීමක් මත සිද වූවක් බවට මේ වන විට තොරතුරු හෙළිව තිබෙන අතර මෙමඟින් රනිල් වික්‍රමසිංහ මහතාගේ මුලික මිනිස් අයිතිවාසිකම් උල්ලංඝණය වූ බවට චෝදනා කරමින් මුලික අයිතිවාසිකම් පෙත්සමක් ශ්‍රේෂ්ඨාධිකරණයට ඉදිරිපත් කිරීමට නියමිත බවත් වාර්තා වෙයි.
දේශපාලන විශ්ලේෂකයන් පෙන්වා දෙන්නේ එම පෙත්සම විභාගයට ගැනීම සිදු වුවහොත් එය ලෝකයේ ම අවධානය දිනා ගන්නා විශේෂ නඩුවක් වීම වැළැක්විය නොහැකි වනු ඇති බවය.
රාජ්‍ය මුදල් අවභාවිත කිරීමේ සිද්ධියකට අදාළව පොදු දේපළ පනත යටතේ වන චෝදනා මත අපරාධ පරීක්ෂණ දෙපාර්තමේන්තුව මගින් පසුගිය 22 වෙනිදා හිටපු ජනාධිපති රනිල් වික්‍රමසිංහ මහතා අත්අඩංගුවට ගනු ලැබු මොහොත වන විට මේ සම්බන්ධයෙන් වන විමර්ශන කටයුතු පවා අවසන් නොකර තිබූ බවත්, අත් අඩංගුවට ගැනීම සාධාරණීය කරගැනීමට අවශ්‍ය තොරතුරු පමණක් අධිකරණට ඉදිරිපත් කර රනිල් වික්‍රමසිංහ මහතාව දින කිහිපයක් හෝ රිමාන්ඩ් බන්ධාගාරය තුළ තැබීම පමණක් මේ කුමන්ත්‍රණකාරීන්ගේ සැලැස්ම වී තිබු බවටත් ඇතැම් තොරතුරු මාර්ග හෙළි කර තිබිණි.
කෙසේ නමුත් මෙම කුමන්ත්‍රණය පරාජය කිරීමට සමත් වූ හිටපු ජනාධිපති රනිල් වික්‍රමසිංහ මහතා කොළඹ ජාතික රෝහලේ දැඩි සත්කාර ඒකකයේ ප්‍රතිකාර ලබමින් සිට ඊයේ (29) රෝහලෙන් පිටව ගියේය.
