1872දී පමණ ලිවයි ස්ට්‍රස් නමැති තරුණය රැකියාව විදියට සිදු කළේ ඇමරිකාවේ පතල් ආශ්‍රිතව වැඩ කරන මිනිසුන්ට රෙදි අලෙවි කිරීම. මේ පතල් ආශ්‍රිතව වෙසෙන කම්කරුවන් දුෂ්කර ජීවිත ගත කිරීම නිසා නිතරම ඇඳුම් අවශ්‍ය උනා.
මේ වෙනකොට ඩේවිඩ් ජැකොබ් නම් තරුණය මේ සඳහා විසඳුමක් ලෙස ඇඳුම් වලට යකඩ බොත්තම් යොදමින් කලිසම වැඩිපුර භාවිතා කළ හැකි ක්‍රමයක් සොයාගෙන තිබුණා.
මෙවැනි ඇඳුම් අතිශය ජනප්‍රිය වීම නිසා ලිවයි ස්ට්‍රස් ජැකොබ් සමඟ එකතු වී තමන්ගෙ ඇඳුම් සඳහාත් මේ යකඩ බොත්තම් භාවිතා කරන්න පෙළඹුණා. මෙලෙස නිර්මාණය කරපු ඇඳුමට ඔවුන් 1873 මැයි 21 වනදා පේටන්ට් බලපත්‍රය ලබාගත්තා. ඩෙනිමේ උපන්දිනය ලෙස සැළකෙන්නේ මැයි 21 වෙනිදායි.
මෙම ඇඳුම එකළ ජීන්ස්(Jeans) යන නමින් තමයි හැඳින්වූවේ. මෙම ජීන්ස් වැඩිපුර නිර්මාණය උනේ ඩෙනිම් රෙද්දෙන්. ඩෙනිම් රෙද්ද නිර්මාණය උනේ කපු නුලෙන්.
ඩෙනිම් යන වචනය ප්‍රංශ වචනයක්. Nimes නම් ප්‍රංශ නගරයක නම එකතු වෙලා තමයි ඩෙනිම් කියන නම හැදිලා තියෙන්නෙ.
මුලින්ම කව්බෝයි හා පතල් කම්කරුවන් වෙනුවෙන් නිර්මාණය වූ ඩෙනිම් විලාසිතාව පසු කාලයේ ජනප්‍රිය උනේ මෙන්න මෙහෙමයි.
ඩෙනිම ලෝකෙට හඳුන්වා දීල ටික කාලයක් යනකොට කව්බෝයි චිත්‍රපට වලත් මේක අඳින්න පටන් ගත්තා.
ඊට පස්සේ දෙවන ලෝක යුද්ධයට සම්බන්ධ උන සෙබළුන් අතර මෙම ඇඳුම ජනප්‍රිය උනා.
දෙවන ලෝක යුද්ධයෙන් පස්සේ ලෙවිස් ලට අමතරව Lee, Wrangler වැනි තවත් සමාගම් කීපයක් ඩෙනිම් නිෂ්පාදනයට මුල පිරුවා.
1950 විතර වෙද්දී තරුණයන් අතරත් මෙය අතිශය ජනප්‍රිය වෙන්න පටන් ගත්තා.
ඒත් එක්කම 1955දී තිරගත උන Rebel Without a Cause චිත්‍රපටය හරහා ඩෙනිම් තරුණ බවේ සංකේතයක් ලෙස තව තවත් ජනප්‍රිය උනා. මේ එක්කම සිනමාහල්, පාසල්, ආපනශාලා වැනි සමහර ස්ථාන සඳහා ඩෙනිම් ඇඳීම තහනම් උනා.
නමුත් 1970 දී මෙය ඇමරිකාව තුල සාමාන්‍ය ඇඳුමක් ලෙස පිළිගනු ලැබුවා.
නැවතත් ඩෙනිම් විලාසිතාවේ නැගීමක් සිදුවන්නේ 2000 වසරේදී පමණ. එයට හේතුව වන්නේ විශාල විලාසිතා ආයතන කාන්තා විලාසිතා සඳහා ඩෙනිම් බහුලව යොදාගැනීමයි.
අද වෙනකොට විවිධ ඩෙනිම් රෙදි වර්ග විතරක් නෙමේ විවිධ නම් වලින් හඳුන්වන විවිධ ඩෙනිම් කලිසම් විලසිතාත් වෙළඳ පොළේ තියනවා.
1873 උපත ලබපු ඩෙනිම අද වනතුරු අමරණීයව පවතිනවා. ඉදිරියටත් ඒක එහෙමම වෙයි. නැත්තම් අපිට පට්ට ගගහා අඳින්න ඇඳුමක් නැතුව යනවා.
