ශ්‍රී ලංකාවේ දළ දේශීය නිශ්පාදනය, විදේශ සංචිත, ණය බර, රාජ්‍ය වියදම් ආදායම්, මෙන්ම එයර්ලංකා, මිහින්ලංකා, තෙල් සංස්ථාව වැනී ප්‍රධාන පෙළේ ආයතන ලැබූ පාඩුව ආදී දේ සම්බන්ධයෙන් පසුගිය රජය නිකුත් කර තිබුණේ ව්‍යාජව සැකසූ සංඛ්‍යා ලේඛනයන්ය.
මේ සම්බන්ධයෙන් ඊයේ සිරස රූපවහිනි නාලිකාවේ පැවැති සටන වැඩ සටහනට සහභා ගී වූ ඇමැති හර්ෂද සිල්වා මහතා සහ මහ බැංකුවේ හිටපු නියෝජය අධිපති ඩබ්.ඒ. විජේවර්ධන මහතා විශේෂ කරුණු දැක්වීමක්ද සිදු කරනු ලැබීය.
ඊයේ පාර්ලිමේන්තුවේදී පසුගිය රජය සමයේ සිදුව ඇති දූෂණය හා නාස්තිය පිළිබඳ උදාහරණ කිහිපයක් අතුරු අයවැය පාර්ලිමේන්තුවට ඉදිරිපත් කරමින් මුදල් අමාත්‍ය රවී කරුණානායක මහතා මෙසේ හෙළි කළේය.
ජාතික ලොතරැයි මණ්ඩලයේ අරමුදල් දේශපාලන අරමුණු සඳහා යොදවා ගැනීම
දළ වශයෙන් රු. මිලියන 270 ක් පමණ ජාතික ලොතරැයි මණ්ඩලයේ අරමුදල් දේශපාලන අරමුණු සඳහා යොදවාගෙන ඇත.
ජාතික ඉතිරි කිරීමේ බැංකුවේ කොටස් ගනුදෙනු
ජාතික ඉතිරි කිරීමේ බැංකුවේ හා මුදල් අමාත්‍යාංශයේ අවධානයෙන් සිටින නිලධාරීන් නිසා ජාතික ඉතිරි කිරීමේ බැංකුවේ වෙන්නට ගිය මහා පරිමාණ කොටස් ගනුදෙනුවක් වැළකී ගොස් ඇත.
උතුරු අධිවේගී මාර්ගයේ ඇස්තමේන්තුගත පිරිවැය ඉක්මවා යෑම
උතුරු අධිවේගී මාර්ගයේ ඇස්තමේන්තුව නැවත ඇගයීමට ලක් කළ විට රු.බිලියන 50ක පමණ ඇස්තමේන්තුගත පිරිවැය ඉක්ම යාමක් වාර්තා වේ.
M17 හෙලිකොප්ටර් මිලදී ගැනීම
වියදම් කළ ඇ.ඩොලර් මිලියන 450ක මුදල් ඇ.ඩො.මිලයන 200ක් විය හැකි වන පරිදි සාකච්ඡා සම්මුති මගින් එකඟතාවයකට පත්විය හැකිව තිබුණි. ඇ.ඩොලර් මිලයන 250ක් (රු.බිලියන 33ක්) මෙමගින් අහිමි වී ඇත.
සීෂෙල්ස් - බදු කෙම්බිම
සීෂෙල්ස් රට තුළ ශ්‍රී ලංකාව විසින් සිදුකර ඇති උපායශීලී නොවන ආයෝජන පිළිබඳ විමර්ශනයක් කිරීම සඳහා නිල විගණනයක් සහ පරීක්ෂණ ක්‍රියාවලියක් ආරම්භ කෙරෙයි.
පොදු රාජ්‍ය මණ්ඩලීය තරග සඳහා ලංසු ඉදිරිපත් කිරීම
රජය විසින් මහජනතාවගේ මුදල් රු.මිලියන 760 කට වැඩි ප්‍රමාණයක් පොදු රාජ්‍ය මණ්ඩලීය ක්‍රීඩා ශ්‍රී ලංකාවේ පැවැත්වීමට ලංසු ඉදිරිපත් කිරීම සඳහා වියදම් කොර ඇත.
ශ්‍රී ලංකන් ගුවන් සමාගම හා ප්‍රභූ පැකේජ
ශ්‍රී ලංකන් ගුවන් සේවය මෑතකදී සිදු කරන ලද ගුවන් යානා මිල දී ගැනීම් තවත් අනවශ්‍ය නාස්තිකාරී වියදමකි. මෙම ගුවන් යානා සඳහා ඇ. ඩොලර් මිලියන 15 ක් (රුපියල් බිලියන 1.95) වටිනා ප්‍රභූ පැකේජයක් අඩංගු කර ඇති අතර, එය නොමිලයේ පිරිනමා ඇත.
