වොෂින්ටන් ඩීසීහි පෙරේදා (16) පැවති මාධ්‍ය හමුවක් අමතමින් අධ්‍යක්ෂවරිය මේ බැව් සඳහන් කළාය.
එහිදී ජූලි කොසැක් මහත්මිය පැවසුවේ ශ්‍රී ලංකාවේ ආර්ථික ක්‍රියාකාරිත්වය සම්බන්ධයෙන් සාර්ව ආර්ථික ප්‍රතිපත්ති ඵලදැරීමට පටන් ගෙන ඇති බවයි. උද්ධමනය ශීඝ්‍රයෙන් පහත වැටීම, ශක්තිමත් විදේශ නිල සංචිත සහ මූල්‍ය පද්ධතියේ ස්ථායිතාව රැකගනිමින් ආර්ථික වර්ධනයේ ආරම්භක සලකුණු සටහන් ප්‍රශංසනීය ප්‍රතිඵල අතර වේ.
ජාත්‍යන්තර මූල්‍ය අරමුදල සමග ඇති කරගෙන තිබෙන එකඟතා මුල් කරගත් සමස්ත වැඩසටහනෙහි කාර්ය සාධනය ශක්තිමත් වී ඇතැයිද ඇය පැවසුවාය.
අවුරුදු හතරක EFF සහය දක්වන මේ වැඩසටහන සහ 2024 වගන්තිය IV උපදේශනය පිළිබඳ දෙවැනි සමාලෝචනය අවසන් කිරීම සඳහා IMF කාර්ය මණ්ඩලය සහ ශ්‍රී ලංකා බලධාරීන් ආර්ථික ප්‍රතිපත්ති පිළිබඳ කාර්ය මණ්ඩල මට්ටමේ එකඟතාවකට පැමිණ තිබෙන බවද ඇය මෙහිදී පැවසුවාය. IMF කළමනාකාරිත්වය විසින් මේ සමාලෝචනය අනුමත කර IMF විධායක මණ්ඩලය විසින් සම්පූර්ණ කරන ලද පසු, ශ්‍රී ලංකාවට අමෙරිකානු ඩොලර් මිලියන 337ක පමණ මූල්‍යකරණයකට ප්‍රවේශය ලැබෙනු ඇතැයි ජූලි කොසැක් මහත්මිය මෙහිදී විශ්වාසය පළ කළාය.
IMF සන්නිවේදන අධ්‍යක්ෂවරිය වැඩිදුරටත් ප්‍රකාශ කළේ IMFහි විධායක මණ්ඩලය විසින් සමාලෝචනය සම්පූර්ණ කිරීම සඳහා කරුණු දෙකක් අවශ්‍ය වන බවයි. එකඟ වූ පූර්ව ක්‍රියාමාර්ගවල අධිකාරිය විසින් ක්‍රියාත්මක කිරීම සහ මූල්‍ය සහතික සමාලෝචනය සම්පූර්ණ කිරීම ඒ අතර වේ.
මෙමඟින් බහුපාර්ශ්වික හවුල්කරුවන්, මූල්‍ය දායකත්වය සහ මූල්‍ය සමාලෝචනය මගින් ණය ප්‍රතිව්‍යූහගත කිරීම සමඟ ප්‍රමාණවත් ප්‍රගතියක් තක්සේරු කරනු ඇති බවද ඇය ප්‍රකාශ කළාය. ණය ප්‍රතිව්‍යූහගත කිරීම සම්බන්ධයෙන් මීළඟ පියවර වන්නේ බාහිර පෞද්ගලික ණය හිමියන් සමඟ සාකච්ඡා අවසන් කිරීම සහ ශ්‍රී ලංකාවේ නිල ණය හිමියන් සමඟ ප්‍රතිපත්තිමය වශයෙන් ගිවිසුම් ක්‍රියාත්මක කිරීම බව අධ්‍යක්ෂවරිය වැඩිදුරටත් අවධාරණය කළාය.
දේශීය ණය මෙහෙයුම් බොහෝ දුරට සම්පූර්ණ කර ඇති අතර, බාහිර බැඳුම්කර හිමියන් සමඟ මූලික ණය ප්‍රතිව්‍යූහගත කිරීමේ සාකච්ඡා ගිවිසුමකින් තොරව අප්‍රේල් මැද භාගයේදී අවසන් වූ බවද ඇය කීවාය.
ප්‍රතිපත්තිමය එකඟතාවකට පැමිණීමේ අරමුණින් සාකච්ඡා දිගටම පවත්වාගෙන යන අතර නිල ණයහිමියාගේ පැත්තෙන් මේ ප්‍රතිපත්තිමය ගිවිසුම් අවසන් කිරීමට අවශ්‍ය බව ඇය පෙන්වා දුන්නාය.
දිනමිණ
