ජනාධිපතිවරයා මේ බව සඳහන් කළේ මාධ්‍ය ආයතන ප්‍රධානීන් සමඟ ජනාධිපති කාර්යාලයේ ඊයේ (14) පස්වරුවේ පැවැති හමුවක දීය.
2024 රාජ්‍ය අය-වැය පිළිබඳ මාධ්‍ය ආයතන ප්‍රධානීන් දැනුවත් කිරීම සඳහා මෙම සාකච්ඡාව කැඳවා තිබූ අතර මුද්‍රිත සහ විද්‍යුත් මාධ්‍ය නියෝජනය කරමින් පුවත්පත් කතුවරු සහ ප්‍රවෘත්ති අධ්‍යක්ෂවරු මීට එක්ව සිටියහ.
එහිදී ජනාධිපතිවරයා අවධාරණය කළේ දේශපාලනයකින් තොරව රටේ ආර්ථිකය ගොඩනැඟීමේ වැඩපිළිවෙළ සාර්ථක කර ගැනීම තම අරමුණ බවයි.
''නව ආර්ථිකයක් ගොඩනැඟීමේ වැඩපිළිවෙළ දැන් අප ආරම්භ කර තිබෙනවා. ඉතා තරගකාරී ආර්ථිකයක් හා වෙළෙඳපොළක් අපට අවශ්‍ය නිසා RCEP සංවිධානය සමඟ මෙන්ම ඉන්දියාව සහ බංග්ලාදේශය සමඟත් යුරෝපා සංගමය සමඟත් අපේ වෙළෙඳපොළ පුළුල් කර ගැනීමට කටයුතු කරනවා. අපි තරගකාරී ආර්ථිකයක් බවට පත් විය යුතුයි. 2024දී ආර්ථිකයේ ධන වර්ධනයක් වන බවට ජගත් මත පළවෙනවා. පළමු රාජකාරිය රට දුගී බවෙන් මුදාගැනීමයි''
එසේම රටේ ආර්ථික සහ දේශපාලන ගමන් මඟ වෙනස් කරන ප්‍රතිසංස්කරණමය වැඩපිළිවෙළට සියලු දෙනාගෙන් සහාය අවශ්‍ය බව ද ජනාධිපතිවරයා සඳහන් කළේය.
රටේ බිඳවැටුණු ආර්ථිකය යළි ගොඩනැඟීම තම අරමුණ වන අතර එම ඉලක්කයට තමා දැනටමත් ළඟාවෙමින් සිටින බව පැවසු ජනාධිපතිවරයා දේශපාලනයකින් තොරව එම ඉලක්කය සාර්ථක ලෙස අවසන් කිරීම තම අභිප්‍රාය බව ද පැවැසීය.
දේශපාලන පක්ෂ මැතිවරණ ඉලක්ක කර ගනිමින් කටයුතු කළත්, තම පළමු රාජකාරිය රට බංකොලොත් භාවයෙන් නිදහස් කර ගැනීම වන අතර තමා අනෙකුත් කටයුතු දෙස අවධානය යොමු කරන්නේ ඉන් අනතුරුව බව ද ජනාධිපතිවරයා කියා සිටියේය.
මෙහි දී අදහස් දැක්වූ ජනාධිපති රනිල් වික්‍රමසිංහ ,
රටක් ලෙස ඉදිරියට යන විට රාජ්‍ය වියදම් සීමා කළ යුතුයි.රාජ්‍ය වියදම් සීමා කිරීම වෙනුවෙන් තීන්දු තීරණ රැසක් අප මෙවර අයවැයෙන් ගෙන තිබෙනවා. ඒ වගේම මහ බැංකුවේ නීතිය අනුව අපට දැන් මුදල් මුද්‍රණය කිරීමට සහ බැංකුවලින් ණය ලබාගැනීම සිදු කළ නොහැකියි. ඒ වගේම ආණ්ඩුවට බාහිර වෙළෙඳපළින් ලබාගත හැකි ණයත් සීමා වී තිබෙනවා. මේ වන විට අපිට විශාල මුදලක් ණය වශයෙන් නැවත ගෙවීමට තිබෙනවා.
විශේෂයෙන් බෞද්ධ ආර්ථික දර්ශනය අනුව රජයේ වියදම් පාලනය කිරීමට අප කටයුතු කර තිබෙනවා. දැන් තිබෙන්නේ ආදායම් උත්පාදනය කර ගනිමින් ඉදිරියට යාමයි. අපේ රටේ මෙතෙක් පැවැති ආර්ථික ක්‍රමය සාර්ථක වී නැහැ. 1972 සම්පූර්ණයෙන් සමාජවාදී ආර්ථිකයකට ගොස් 77 දී ආර්ථිකයෙන් කොටසක් විවෘත කළා. ආර්ථිකය විවෘත කර රාජ්‍ය සංස්ථා ඇති කර රජයේ පාලනය යටතේ මෙය ඉදිරියට ගෙන යන්න බැහැ.
සිංගප්පුරුව, මැලේසියාව වැනි දියුණු රටවල ආර්ථිකය අද සම්පූර්ණයෙන් රජයේ පාලනයෙන් ඉවත් කර තිබෙනවා. මේ අය වැයෙන් ලංකාවේ විශාලම පුද්ගලීකරණය අප සිදු කරනවා. ඒ තමයි ඉඩම් සංවර්ධන පනත යටතේ ඉඩම් ලබාගත් ගොවින්ටත්, සාමන්‍ය ජනතාවටත් මේ ඉඩම්වල සම්පුර්ණ සින්නක්කර අයිතිය ලබා දීම. ඒ වගේම විශේෂයෙන්ම රජයේ මහල් නිවාසවල සිටින අයටත් ඒ අයිතිය ලබා දෙනවා.
රටේ ආර්ථිකය වෙනුවෙන් අපි රුපියල් බිලියන 500යි, ට්‍රිලියනයයි අතර වත්කම් ඇතුළු කර තිබෙනවා. ශ්‍රී ලංකන් ගුවන් සේවාව අළෙවි කර, මේ සියලු සේවාවන් එකතු කළත් මෙපමණ මුදලක් ලැබෙන්නේ නැහැ. මේවායේ නිෂ්පාදන කටයුතු දැන් ඉහළ නැංවිය හැකියි. එය අප ගත් විශාල පියවරක් ලෙස මම දකිනවා. මෙය තමයි ලංකාවේ තිබෙන විශාලම පෞද්ගලීකරණය.
කිසිදු අවස්ථාවක සාමාන්‍ය ජනතාවගේ ඉඩම් අයිතිය ලබා දුන්නේ නැහැ. නමුත් ෂ්‍රැංග්‍රිලා හෝටලයට ඉඩම් අයිතිය දුන්නා. නමුත් සාමාන්‍ය ජනතාවට මෙය ලබා දුන්නේ නැහැ. දැන් එය සිදු කර තිබෙනව. අපි මහවැලිය ආරම්භ කළේ එම ඉඩම් ජනතාවට ලබාදීමට. නමුත් සී කලාපයේ හෝ එච් කලාපයේ ඉඩම් ජනතාවට ලබා දීම සිදු කළේ නැහැ. දැන් මේ සියල්ල ජනතා අයිතියට පත් කර තිබෙනවා.
නව ආර්ථිකයක් ගොඩනැඟීමේ වැඩපිළිවෙළ දැන් අප ආරම්භ කර තිබෙනවා. ඉතා තරගකාරී ආර්ථිකයක් හා වෙළෙඳ පොළක් අපට අවශ්‍ය නිසා RCEP සංවිධානය සමඟ මෙන්ම ඉන්දියාව සහ බංග්ලාදේශය සමඟත් යුරෝපා සංගමය සමඟත් අපේ වෙළෙඳපොළ පුළුල් කර ගැනීමට කටයුතු කරනවා. අපි තරගකාරී ආර්ථිකයක් බවට පත්විය යුතුයි. තරගකාරි නොවන ව්‍යාපාර තරගකාරී කර ගැනීමට සිදු වෙනවා. ඒ සඳහා අප වෙනම ආධාර ලබා දෙනවා.
ආර්ථිකය ගොඩනැඟීමේ කෙටිකාලීන වැඩසටහන් ලෙස අප කෘෂිකර්ම සහ ධීවර නවීකරණ වැඩසටහන් ආරම්භ කර තිබෙනවා. අපි කෘෂිකර්මය නවීකරණය කරනවා නම් රටේ විශාල කෘෂි ආර්ථිකයක් යළි ඇති කළ හැකියි.
ඒ වගේම සංචාරක ව්‍යාපාරයෙන් ලැබෙන ආදායම වැඩි කර ගැනීමට සහ මෙරටට පැමිණෙන සංචාරකයන් මිලියන 05 දක්වා වැඩිකර ගැනීමටත් අපි පියවර ගෙන තිබෙනවා. ඩිජිටල් ආර්ථිකයක් ඇති කිරීමේ වැඩපිළිවෙළ ද රජය දැන් ආරම්භ කර තිබෙනවා. කෘත්‍රීම බුද්ධිය ඇතුළු නව තාක්ෂණය සමඟ ඉදිරියට යාමට අප කටයුතු කර තිබෙනවා. මෙතෙක් ඒ පිළිබඳ අවධානය යොමුව තිබුණේ නැහැ.
මේ සියලු කටයුතු සඳහා අපට නව මානව සම්පතක් අවශ්‍යයි. අපේ අධ්‍යාපන ක්‍රමයේ පවතින අඩු-පාඩු මඟහරවා ගනිමින් නව අධ්‍යාපන ක්‍රමයක් ඇති කිරීමට අප බලාපොරොත්තු වෙනවා. විශේෂයෙන්ම නව විශ්වවිද්‍යාල ඇති කිරීම සඳහා රජයේ වගේම රජයේ නොවන අංශවලටද අවස්ථාව ලබා දීමට නව නීති ගෙන එනවා. එම විශ්වවිද්‍යාලවලින් ගාස්තු අය කරනවා නම් ශිෂ්‍යයන්ට රජයෙන් සහන ණයක් ලබා දෙනවා. ඒ වගේම අතපසු වූ වෘත්තීය පුහුණු අංශය අලුතින් සංවිධානය කර මේ සිල්ල පළාත් සභා 09 යටතේ ඉදිරියට ගෙන යාමට බලාපොරොත්තු වෙනවා.
පළාත් සභාවලට අපනයන ආර්ථිකය සඳහා සහාය දැක්විය හැකි අන්දමින්, පැවැති සීමා ඉවත් කර තිබෙනවා. ඒ වගේම අපි නව රැකියා අවස්ථා සහ ආදායම් මාර්ග උත්පාදනය කරගත යුතුයි. අපි මෙම කටයුතු 2030 වන විට කළ යුතුයි. ඊට වඩා කාලයක් අපට නැහැ. ඒ නිසා මෙම 2024 සිට නව ආර්ථිකය ගොඩනැඟීමේ වැපිළිවෙළ අපි ආරම්භ කරනවා.
ඒ වගේම අප ආණ්ඩුක්‍රම ව්‍යවස්ථාවේ 21 වැනි සංශෝධනය ඉදිරිපත් කර තිබෙනවා. කොමිෂන් සභා ඇති කර තිබෙන අතර පාර්ලිමේන්තු අධීක්ෂණ කමිටු ගණනාවක් ආරම්භ කර තිබෙනවා. ඒවායේ වැඩකටයුතු ක්‍රියාත්මක වන අතර වාර්තා කිහිපයක් මට ලබා දී තිබෙනවා. ඒ අනුව විධායකයේ වැඩකටයුතුවලට පාර්ලිමේන්තුවේ සහාය හිමි වෙනවා.
එසේම දුෂණ විරෝධි පනත සම්මත කරගෙන තිබෙන අතර මතුව තිබෙන ප්‍රශ්න විසඳා ගනිමින් ව්‍යවස්ථා දායක සභාවෙන් එම කණ්ඩායම් පත් කරන තෙක් මම බලා සිටිනවා.
ඒ වගේම අපි ජාත්‍යන්තර මුල්‍ය අරමුදල සමඟ සාකච්ඡා කළ පරිදි “රජයේ පාලන විශ්ලේෂණය” ක්‍රියාත්මක කිරීමට අපට ලබා දී තිබෙනවා. එය සිංහල සහ දෙමළ භාෂාවෙන් ලැබුණු පසු එය රජය විසින් පිළිගෙන ලබන වසරේ සිට ක්‍රියාත්මක කිරීමට භාර දෙනවා. එය ක්‍රියාත්මක වෙනවද කියා සොයා බැලීමට පාර්ලිමේන්තුවේ තව අධීක්ෂණ කමිටුවක් පත් කිරීමද අපේක්ෂාවයි. දුෂණය පිළිබඳ සෙවීමට මෙන්ම එය වැළැක්වීමට මේ තුළින් අප බලාපොරොත්තුවන බව කිවයුතුයි.
එමෙන්ම එක්සත් රාජධානිය සිදු කළ අන්දමින් පාර්ලිමේන්තු ප්‍රමිතීන් පිළිබඳ කෙටුම්පත ඉදිරිපත් කිරීමට සූදානම් කර තිබෙනවා.
රටේ දේශපාලන ක්‍රමයේ වෙනසක් අවශ්‍ය බව පැවසුවා. ඒ වෙනස ඇති කිරීම වෙනුවෙන් අප මේ වන විට කරුණු දෙකක් ඉටු කර තිබෙනවා. රටේ පවතින දේශපාලන ක්‍රමය දෙස අවධානය යොමු කර එය ඉදිරියට ක්‍රියාත්මක කරනවාද, නැත්නම් සංශෝධන අවශ්‍යද කියා සොයා බැලීමට මම කොමිසමක් පත් කර තිබෙනවා.
දේශපාලන පක්ෂ නිසි ලෙස ක්‍රියාත්මක වන්නේ නැතිනම් ප්‍රජාතන්ත්‍රවාදයක් නැහැ. ඒ නිසා දේශපාලන පක්ෂ පාලනය කරන්නේ කෙසේද හා මැතිවරණ නීති සහ මැතිවරණ වියදම් පාලනය කරන්නේ කෙසේද කියා සොයා බැලීම එමගින් සිදු කරනවා.
ඒ සමඟම ජන සභා ක්‍රමය ඇති කිරීමට මම බලාපෙරොත්තු වෙනවා. එක වසරක් තුළ ක්ෂේත්‍ර කිහිපයක මෙම වෙනස්කම් සිදු කර තිබෙනවා. මෙවර අය-වැය ඉදිරිපත් කර තිබෙන්නේ එම පසුබිම තුළ බව කිව යුතුයි.
ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්. එස් සමරතුංග මහතා
ශ්‍රී ලංකා ආර්ථිකයේ ගැඹුරුම දත්ත අපි ළඟ නැහැ. අපි ළඟ තිබෙන්නේ 2022 රටේ ආර්ථික අවපාතය පිළිබඳ දත්තයි. ගිය වසරේ රටේ ආර්ථිකය සියයට 7.3කින් හැකිලුණා. මේ වසරේදීත් ආර්ථිකය සියයට 2%කින් පමණ හැකිලී තිබෙනවා. නමුත් 2024 වසරේ දී ආර්ථිකය ධන වර්ධනයක් සිදුවේ යැයි ජාත්‍යන්තර මූල්‍ය ආයතන පවා පුරෝකථනය කර තිබෙනවා. ලබන වසරේ දී 1.8% ධන වර්ධනයක් ලැබෙනු ඇතැයි මේ වන විට අපේක්ෂා කරනවා. ඇතැම් විට එම ප්‍රමාණය මීටත් වඩා වැඩිවිය හැකියි. ආර්ථික අවපාතයෙන් අප ප්‍රතිසාධන මට්ටමක් කරා ඉහළට පැමිණ තිබෙනවා. එය දැනට තිබෙන සංඛ්‍යාලේඛන මඟින් ද තහවුරු වෙනවා.
2022 අප්‍රේල් මාසය වන විට අපේ රටේ තිබූ විදේශ සංචිත ප්‍රමාණය ඩොලර් මිලියන 24ක් වෙනවා. දැන් එම ප්‍රමාණය ඩොලර් බිලියන 3.5 දක්වා වර්ධනය කර ගැනීමට වත්මන් ආණ්ඩුව සමත්ව තිබෙනවා. ලබන වසරේ දී ප්‍රාථමික ගිණුමේ ශේෂය ධන අගයක් ගනු ඇතැයි අපේක්ෂා කරනවා. ණය ගෙවීම පිළිබඳ කතා කරන විට ප්‍රාථමික ගිණුමේ ශේෂය ඉතාමත්ම වැදගත්. වාහන ආනයන සීමාවන් හැර දැනට වෙනත් ආනයන සීමාවන් කිසිවක් නැහැ. ඒ වගේම විදේශ විනිමය සීමාවකුත් නැහැ. ජාත්‍යන්තර මූල්‍ය අරමුදල සමඟ 2023 එළැඹි එකඟතාවට අනුව දේශීය ණය ප්‍රතිව්‍යුහගතකරණය කර අවසන්. විදේශ ණය ප්‍රතිව්‍යුහගත කිරීම පිළිබඳ මේ වන විට සාකච්ඡා කරමින් පවතිනවා. මේ දක්වා සිදු වූ සියලු සාකච්ඡා සාර්ථක වී තිබෙනවා.
පසුගිය වසර දෙක පුරාවට ද්විපාර්ශ්වික ණය සහ ස්වෛරී බැඳුම්කර ණය රජය විසින් ගෙවනු ලැබුවේ නැහැ. විදේශ ණය සහ බහුපාර්ශ්වීය ආයතන මගින් ගත් ණය දිගින් දිගටම ගෙවීම් සිදු කරමින් පැමිණියා. නොගෙවූ ණය ප්‍රමාණය එකතු වීමක් සිදුව තිබෙනවා. ජාත්‍යන්තර මූල්‍ය අරමුදල සමඟ එකඟතාවයට පැමිණීමෙන් පසුව එම ණය ප්‍රමාණයත් ගෙවා දැමිය හැකියි.
ලබන වසරේ දී ඇස්තමේන්තුගත රාජ්‍ය ආදායම රුපියල් බිලියන 4,127ක්. වියදම රුපියල් බිලියන 6,978ක් වෙනවා. අය-වැය හිඟය 8%ක ප්‍රමාණයකින් පහළ මට්ටමක පවතිනවා. ජනාධිපතිතුමා අයවැයේ දී පැවසූ ආකාරයටම මුදල් අච්චු ගැසීමේ හැකියාවක් මේ වන විට නැහැ. රජයේ ප්‍රාථමික සුරැකුම් වෙළඳපළට මහ බැංකුවට ඇතුළුවීමේ හැකියාවක් ද නැහැ. ඒ වගේම රාජ්‍ය බැංකුවලට ණය දීමේ දී සීමාවන් පනවා තිබෙනවා.
මින් ඉදිරියට රජයේ වියදම් කළමනාකරණය කිරීමට සිදුවන්නේ රජය උපයන ආදායම්වලින් බව කිව යුතුයි. පාර්ලිමේන්තු පනතක් මගින් ණය ගැනීමේ සීමාවන් සඳහන් කර තිබෙනවා. ජාත්‍යන්තර මූල්‍ය අරමුදලේ එකඟතාවන්ට අනුව ණය ගැනීම් සීමා වෙලා තිබෙනවා. එම නිසා අනාගතයේ දී අප මුදල් වියදම් කිරීමේ දී ඒ සඳහා අවශ්‍ය මුදල් උපයා ගත යුතුයි. ඒ සඳහා අවශ්‍ය වන යෝජනා රාශියක් මෙම අයවැයේ ඉදිරිපත් කර තිබෙනවා.
මේ අප ගමන් කරමින් සිටින්නේ ජාත්‍යන්තර මූල්‍ය අරමුදල සමඟ වසර 4ක වැඩපිළිවෙළක් ඔස්සේයි. එකතු වූ ආදායම් සහ වියදම් රටාවක් පවතින බැවින් එම රටාවෙන් පරිබාහිරව විශාල ක්‍රමවේදයක් අනුගමනය කිරීමට ඉක්මනින් හැකියාවක් නැහැ. ජාත්‍යන්තර මූල්‍ය අරමුදලේ බැඳීමත් සමඟ ණය ප්‍රතිව්‍යුහගත කරන වැඩපිළිවෙළ ඉදිරියට කරගෙන යනවා. විදේශ ණය හිමියන් ද එම කටයුත්තට එකඟතාව පළකර තිබෙනවා.
එම වැඩසටහන දිගටම ක්‍රියාත්මක කරගෙන යාමට නම් ජාත්‍යන්තර මූල්‍ය අරමුදලේ එකඟතාවන් දිගටම ක්‍රියාත්මක කළ යුතු වෙනවා. මෙය සාමාන්‍ය කලෙක සිදුවු වැඩසටහනක් නොවෙයි. අප ජාත්‍යන්තර මූල්‍ය අරමුදල සමඟ එකඟතාවන්ට පැමිණියේ ආර්ථිකය කඩා වැටුණු පසුවයි. එම නිසා එම ජාත්‍යන්තර මූල්‍ය අරමුදලේ වැඩපිළිවෙළින් බැහැරව කටයුතු කිරීමට රජයට හැකියාවක් නැහැ. ජාත්‍යන්තර මූල්‍ය අරමුදල සමඟ ආර්ථික ප්‍රතිසංස්කරණ වැඩසටහන සාර්ථකව ක්‍රියාත්මක වනවා වගේම එය රජය විසින් ම යෝජනා කළ වැඩසටහනක් වනවා. ජාත්‍යන්තර මූල්‍ය අරමුදලේ වැඩසටහන මඟින් සිදුවන්නේ ආර්ථිකය ස්ථායිකරණයයි. පසුගිය මාස 16ක කාලය තුළ එම වැඩපිළිවෙළ ක්‍රියාත්මක කර සාධනීය ප්‍රතිඵල ලබා ගෙන තිබෙනවා.
ආර්ථිකය ශක්තිමත් කිරීම සඳහා යෝජනා 85ක් මෙම අය-වැය තුළ හඳුන්වා දී තිබෙනවා. එයින් ආර්ථිකය වේගවත් කිරීමට බලාපොරොත්තු වෙනවා. නව ආර්ථිකයට ගැළපෙන ආකාරයට නව නීති සකස් කිරීමට ද මෙහි දී යෝජනා කර තිබෙනවා. නිෂ්පාදන වෙළඳ පොළේ තිබෙන අඩු-පාඩු සඳහා නව යෝජනා ඉදිරිපත් කර තිබෙනවා. ඒ වගේම ශ්‍රම වෙළෙඳ පොළ ශක්තිමත් කිරීමටත් අය-වැය මගින් අවධානය යොමු කර තිබෙනවා. ප්‍රාග්ධන වෙළඳ පළ සහ ඉඩම් පිළිබඳ යෝජනා රාශියක් මෙවර අය වැයේ ඇතුළත් වෙනවා.
ජනාධිපතිතුමා සඳහන් කළ ආකාරයට දීර්ඝකාලයක් පුරා නිරවුල් නොවූ ඉඩම්වල හිමිකම ජනතාවට ලබාදීමටත් පියවර ගෙන තිබෙනවා. අඩු ආදායම්ලාභී නාගරික නිවාස හිමියන්ටත් හිමිකම් ඔප්පු ලබා දීමට යෝජනා කර තිබෙනවා. මින් පසු ඒ අයට කුලී ගෙවන්න සිදු වෙන්නේ නැහැ. අප ඒ පිළිබඳ සංගණනයක් සිදුකරමින් තිබෙනවා. එම යෝජනා දෙකේ මූල්‍ය වටිනාකම රුපියල් ට්‍රිලියන දෙකක් පමණ වෙනවා. එම දේපළ රටේ වෙළඳපළට එකතු වෙනවා. දැනට ඇස්තමේන්තු කර තිබෙන ආකාරයට බලපත්‍රලාභීන් ලක්ෂ විස්සක් පමණ සිටිනවා. ඊට වැඩි වෙන්නත් පුළුවන්.''
-P.M
