රජයේ ඉදිරි සැලසුම් සහ ඉලක්ක අමාත්‍යාංශ වෙත ලබාදී තිබේ. නිලධාරීන් දිරිගන්වමින් අපේක්ෂිත ඉලක්ක සපුරා ගැනීම අමාත්‍යාංශ ලේකම්වරු සතු වගකීමක් බව ජනාධිපතිවරයා මෙහිදී පැවසීය.
ලංකාවේ පුරවැසියන් රාජ්‍ය සේවය පිළිබඳව දරණ ආකල්පය තරමක් ඍණාත්මකය. අකාර්යක්ෂම රාජ්‍ය නිලධාරීන් හමුවේ මෙන්ම අල්ලසක් ලබා දීමෙන් තොරව තමාට අවශ්‍ය සේවාව රාජ්‍ය නිලධාරියෙක්ගෙන් ලබා ගැනීමට නොහැකි වෙන අවස්ථාවක, පුරවැසියෙක්ට සමස්ත රාජ්‍ය සේවයම පිළිබඳව ඇති වන්නේ අප්‍රසාදයකි. රටක පුරවැසියන්ට සිය සේවය ලබා දීමේදී ඒ සඳහා වගවෙන සහ විනිවිදභාවයෙන් යුතුව ක්‍රියා කරන, නිවැරදි සහ කාර්යක්ෂම රාජ්‍ය සේවයක් ඇතිවීම ඒ රටේ දූෂණය අවම කිරීමේ පළමු පියවරයි. මෙම ක්‍රියාවලියෙහි සම්පුර්ණ වගකීම ඇත්තේ සියලු අමාත්‍යාංශ ලේකම්වරු අතෙහිය. එනම් රාජ්‍ය සේවය යහපත් තැනකට ගෙනවිත් රට සංවර්ධනය කිරීමට සුවිශාල කැප කිරීමක් ඇත්තේ එකී අමාත්‍යාංශ ලේකම්වරු අතය. ඔවුන් යටතේ සිටින සෙසු ලේකම් වරු, දෙපාර්තමේන්තු ප්‍රධානින් ද මීට අඩු වැඩි වශයෙන් වගතිව යුතුය. මෙරට බොහෝ රාජ්‍ය ආයතන පාඩු ලබන ආයතන බවට පත් වීමට සෘජුවම දායකත්වය සපයා ඇත්තේ එදා මෙදා තුර මෙරට සිටි අමාත්‍යාංශ ලේකම්වරයාගේ සිට ඉහළ තනතුරු දරණ ප්‍රධාන්ගේ යැයි කීම අතිශෝක්තියක් නොවනු ඇත.
