මේ මුදලට අමතරව කොවිඩ් මර්දන එන්නත් මිල දී ගැනීම සඳහා ආණ්ඩුව මේ වන විට අමෙරිකානු ඩොලර් මිලියන එකසිය දහයකට අධික මුදලක් වැය කර ඇතැයිද මුදල් අමාත්‍යාංශයේ ලේකම්වරයා සංඛ්‍යා ලේඛන උපුටා දක්වමින් කියා සිටියේය.
මේ වසරේ ගෙවී ගිය මාස හයක කාලයේදී පමණක් කොවිඩ් ආසාදිත වූවන්ට ප්‍රතිකාර කිරීම, නිරෝධායනයට ලක් කිරීම, වියළි ආහාර මලු දීම රුපියල් පන්දහසක දීමනාව දීම ආදි කටයුතු සඳහා රුපියල් කෝටි පන්දහස් තුන්සියයක් වැය කර ඇත. ඉකුත් 2020 වසරේදී රුපියල් කෝටි දාහත්දහකට අධික මුදල් ප්‍රමාණයක් වැය කර ඇතැයිද එස්. ආර්. ආටිගල මහතා පැවසීය.
ආණ්ඩුව කොවිඩ් පාලන කටයුතු සඳහා වැය කර තිබෙන මුදල් සම්භාරය රුපියල් කෝටි විසිදෙදහස් තුන්සියයක් ලෙස සඳහන් කළත් යුද හමුදාව වැය කරන මුදල් සහ කොවිඩ් මධ්‍යස්ථාන ඉදිකිරීම්, රෝහල් ඇදන් පහසුකම් දීම, ඔක්සිජන් හා අනෙකුත් කටයුතු සඳහා වැය කළ මුදල් ප්‍රමාණය ගණනය කළහොත් සමස්ත මුදල් ප්‍රමාණය තවත් ඉහළ යන බවද ඒ මහතා කීය.
මේ වන විට යුද හමුදාව මඟින් පවත්වාගෙන යන කොවිඩ් මධ්‍යස්ථානවල සිටින ජනතාවට හමුදාව විසින් වැය කරන මුදල්ද ආපසු මහා භාණ්ඩාගාරය හරහා ප්‍රතිපාදනය කිරීමටද සිදුව ඇතැයි ඒ මහතා පෙන්වා දුන්නේය.
ආණ්ඩුව මේ මොහොතේදී වැය කර ඇති මුදල්වලට අමතරව ලෝක සෞඛ්‍ය සංවිධානය එන්නත් නිෂ්පාදිත රටවල්ද කොවිඩ් පාලන කටයුතු සඳහා උපකාර කළ බවද ඒ මහතා කීය. කොවිඩ් පැතිර යෑම හා ආසාදිතයන් හමුවීමේ අඩුවක් නැති නිසා මොන අසීරුතා තිබුණත් ජනතාවට අවශ්‍ය සියලු සෞඛ්‍ය පහසුකම් සහ සුබසාධන කටයුතු අඛණ්ඩව කර ගෙන යෑමට ආණ්ඩව පියවර ගන්නා බවත් රටේ සංවර්ධනය සඳහා වැය කිරීමට තිබූ මුදල් ජනතාවගේ ආරක්ෂාව සඳහා යොදවන බවද ඒ මහතා සඳහන් කළේය.
- දිනමිණ
