ඒ අනුව, ‘ජී7’ නායකයන්ගෙන් යුක්රේනයට ඇමෙරිකන් ඩොලර් බිලියන 50 ක මුදලක් යුද ආධාර ලෙස හිමිවනු ඇත.
මීට වසර දෙකකට පෙර, රුසියාව, යුක්රේනයට එරෙහිව හමුදා ක්‍රියා මාර්ගයක් අනුගමනය කළේ, යුක්රේනය උතුරු අත්ලාන්තික් ගිවිසුම් සංවිධානය හෙවත් ‘නේටෝ’සංවිධානයේ සාමාජිකත්වය ඉල්ලා සිටි බැවිනි.
‘නේටෝ’ යනු රුසියාවෙන් එල්ල වන තර්ජනවලට එරෙහිව ඇමෙරිකාව, කැනඩාව ඇතුළු බටහිර රටවල් පිහිටුවාගත් යුද සන්ධානයයි. ‘ජී7’ කණ්ඩායමට අයත් රටවල් බොහොමයක් ‘නේටෝ’ සාමාජිකයන් ද වෙයි.
යුද ආධාර වශයෙන්, ‘ජී7’ නායකයන් යුක්රේනයට ලබා දෙන්නේ, විදේශවල ඇති අත්හිටුවන ලද රුසියානු වත්කම්ය. මෙම රුසියානු වත්කම් අත්හිටුවීම සිදු කෙරුණේ, රුසියාව යුක්රේනයට එරෙහිව හමුදාමය ක්‍රියා මාර්ගයක් අනුගමනය කළ අවස්ථාවේදීය.
මාධ්‍ය වාර්තා කරන අන්දමට, ඇමෙරිකන් ඩොලර් බිලියන 50 ක එම මුදල යුක්රේනයට හිමිවනු ඇත්තේ මෙම වසර අවසානයේ දීය.
‘යුක්රේන යුද්ධයේ දී අප කිසිම අවස්ථාවක යුක්රේනය අමතක කර නැහැ. අප කිසිම අවස්ථාවක පසුබසින්නේ නැහැ.’ ඇමෙරිකන් ජනාධිපති ජෝ බයිඩන් පෙන්වා දී තිබේ. ඉතාලියේ පැවැත්වෙන ‘ජී7’ සමුළුවට යුක්රේන ජනාධිපති ව්ලොදිමීර් සෙලෙන්ස්කී ද සහභාගී වෙයි. ‘ජී7’ නායකයන් සහ සෙලෙන්ස්කී අතරේ වෙන වෙනම සාකච්ඡා පැවැත්වුණු බව ද පැවැසෙයි.
ඇමෙරිකන් ජනාධිපති බයිඩන් සහ යුක්රේන ජනාධිපති සෙලෙන්ස්කී, වසර 10 ක කාලයක් සඳහා යුක්රේනය සමඟ ආරක්ෂක ගිවිසුමකට ද අත්සන් කළේය. කෙසේ නමුත් යුක්රේනය වෙනුවෙන් රුසියාව සමඟ සටන් වැදීමට කිසිම විටම ඇමෙරිකන් සොල්දාදුවන් යවන්නේ නැතැයි ඇමෙරිකන් ජනාධිපතිවරයා පෙන්වා දුන්නේය.
ඇමෙරිකාවට අමතරව ජපානය ද යුක්රේනය සමඟ වසර 10 ක ආරක්ෂක ගිවිසුමකනට අත්සන් කළ බව පැවැසෙයි. ජපන් අග්‍රාමාත්‍ය ෆුමියෝ කිෂිඩා සහ යුක්රේන ජනාධිපති අතරේ ද විශේෂ හමුවක් පැවැත්විණි.
-P.M
