මේ අනුව රාජ්‍ය උත්සවවලදී ජාතික කොඩිය පළාත් කොඩිය ප්‍රාදේශීය කොඩිය එසවීම හැර වෙනත් කොඩි ප්‍රදර්ශනය ද මැතිවරණ කාල වකවානුව තුළ සපුරා තහනම් වන අතර පාසල් උත්සවවලදී ද දේශපාලන කතා පැවැත්වීමෙන් වැළකී සිටිය යුතුය.
රජයේ සංවර්ධන කටයුතුවලදී නිමා කරන ලද වැඩ කටයුතු විවෘත කිරීමේ උත්සව පැවැත්වීමට තහනමක් නැති අතර දේශපාලන වාසි තකා අලුතෙන් වැඩ ආරම්භ කිරීම භාණ්ඩ උපකරණ බෙදා දීම ද සපුරා තහනම්වේ.
රාජ්‍ය දේපළ පරිහරණය කිරීමේදී පවතින තහනම් නීති රිති ඒ ආකාරයෙන්ම ක්‍රියාත්මක වන අතර මේ නීති රිති සම්බන්ධයෙන් මැතිවරණ කොමසාරිස්වරයාගේ දැඩි අවධානය යොමු කරවනු ඇත.
මැතිවරණයට ඉදිරිපත් වන ස්වාධීන කණ්ඩායම්වල කාර්යාල වෙනත් පක්ෂවල ප්‍රචාරක කටයුතු හා කාර්යාල ලෙසින් පවත්වාගෙන යාම ද සපුරා තහනම්ය.
මේ අනුව මහ මැතිවරණ කාල සීමාවේ පන්සල් පල්ලි කෝවිල් ඇතුළු ආගමික මධ්‍යස්ථානවල දේශපාලන කතා පැවැත්වීම තහනම් වනු ඇති අතර මෙම නීති මෙවර අකුරටම ක්‍රියාත්මක වන බව පැවසේ.
