අගමැතිවරයා මේ බව සඳහන් කළේ කෝට්ටේ සිරිකොත එජාප මූලාස්ථානයේ ඊයේ (26) පැවැති මාධ්‍ය හමුවක දී ය.
මැතිවරණය සම්බන්ධයෙන් පක්ෂයේ නිලධාරින් ඇතුළු ප්‍රබලයන් සමඟ පැවැත්වූ සාකච්ජාවක් අතරතුර දී මෙම මාධ්‍ය හමුව පැවැතිවිණි. මෙවර මහ මැතිවරණය පැවැත්වෙන්නේ පවතින මැතිවරණ ක්‍රමය යටතේම බව මාධ්‍යවේදිනියක ඇසු ප්‍රශ්නයකට පිළිතුරු දෙමින් අගමැතිවරයා කීය.
මැතිවරණ සටන මෙහෙයවීම සම්බන්ධයෙන් පක්ෂයේ ප්‍රධාන නිලධාරින් සමඟ සාකච්ජා කර තීරණවලට එළැඹුණු අතර මැතිවරණ ව්‍යාපාරයේ වගකීම් භාර දීමේ කටයුතු සියයට අනූවකින් අවසන් බව ද කී අගමැතිවරයා එජාපයට සහාය දෙන භික්ෂු සංවිධාන ඇතුළු සියලුම දෙනාගේ ශක්තිය ලබා ගෙන මැතිවරණයට සුදානම් වන බව ද කීය. ජන්ද සටන තමාගේත් පක්ෂයේ සභාපති සහ මහලේකම්ගේ මෙහෙයවීම මත සිරිකොත මූලස්ථානය කේන්ද්‍ර කර ගනිමින් පැවැත්වෙන බව ද අගමැතිවරයා කීය.
මැතිවරණය ජයග්‍රහණය කළ හැකි ජන්ද පදනමක් ඇති අය අපේක්ෂකයන් වශයෙන් තෝරා ගන්නා බවත් ඒ අනුව සංවිධායකයන් පත් කෙරෙන බවත් පැවසූ අගමැතිවරයා එක්සත් ජාතික පක්ෂයේ සළකුණ යටතේ තරග කරන අනෙකුත් පක්ෂ සමඟ ද සාකච්ජා කර ඒ ඒ දිස්ත්‍රික්කවල අපේක්ෂකයන් බෙදා ගන්නා බවත් පැවැසීය.
යහපාලනයට සහ ජනාධිපති මෛත්‍රිපාල සිරිසේන මහතාට සහාය දෙන පාර්ලිමේන්තුවක් අවශ්‍ය බව සඳහන් කළ අගමැතිවරයා මැතිවරණයෙන් පසුව පත්වෙන පාර්ලිමේන්තුවේ දී සහාය දෙන පක්ෂ එකතු වී ජාතික ආණ්ඩුවක් බිහි කිරීමට බලාපොරොත්තු වන බව ද කීය.
මෙම අවස්ථාවට පක්ෂයේ සභාපති මලික් සමරවික්‍රම, මහ ලේකම් කබීර් හෂීම්, අමාත්‍යවරුන් වන ලක්ෂ්මන් කිරිඇල්ල, රෝසි සේනානායක, රුවන් විජේවර්ධන, එජාප ජාතික සංවිධායක දයා ගමගේ මහත්වරුන් ඇතුළු පක්ෂයේ නිලධාරීහූ සහභාගි වූහ.
dinamina
