මේ ජයග්‍රහණය මල්ෂාට දැනෙන්නේ කොහොමද?

ගොඩක් ලොකු සතුටක් දැනෙනවා. තරගකරුවන් විශාල පිරිසක් අතරින් පැමිණ මම මගේ දක්ෂතා පෙන්නුවා. ඒ වෙනුවෙන් ලද සම්මානය තමයි මේ.

ඩාන්සින් ස්ටාර් වැඩසටහනට සම්බන්ධ වුණේ කොහොමද?

මම ටීවි එකේ දැකලා සිරස ඩාන්සින් ස්ටාර් වැඩසටහනට අයදුම් කළා. මීට පෙර වැඩටහන් බලලා ගොඩක් ආසාවෙන් හිටියේ. නර්තනයට මම ගොඩක් කැමැතියි. ඒ නිසා මගේ දක්ෂතා සිරස ඩාන්සින් ස්ටාර් වැඩසටහන යටතේ ඉදිරිපත් කරන්න ඕනි කියලා මම හිතුවා. සිරසෙන් මට කෝල් කරලා ඩාන්සින් ස්ටාර් වැඩසටහනට පෙර සාකච්ඡාවකට එන්න කියලා දැනුම් දුන්නා. ලියුමකින් දැනුම් දුන්නා කිව්වත් මට ලියුමක් නම් ලැබුණේ නැහැ. ඇත්තටම මගේ ලියුම අම්මා හංගලා.

පළමු වටයේදී මොකද හිතුනේ?

ලොකු පිරිසක් ඇවිත් හිටියා. ඉදිරිපත් වෙන්න ලැබුණු අවස්ථාව ගැන සතුටින් හිටියා.

ඩාන්සින් ස්ටාර් වෙන්න හිතුවෙ නැද්ද?

මුලින්ම නම් හිතුවේ නැහැ. අන්තිම දස දෙනා අතරට සුදුසුකම් ලැබුවාට පස්සේ නම් මගේ උපරිම කැපවීමෙන් කිරුළ දිනනවාමයි කියා අධිෂ්ඨාන කළා.

නර්තනයට උනන්දුව ඇති වුණේ?

පොඩි කාලයේ පටන්ම මම නර්තනයට ගොඩක් ලැදියි. මම මීගමුව ආවේ මරියා කන්‍යාරාමය සහ හරිශ්චන්ද්‍ර ජාතික පාසලෙන් අධ්‍යාපනය ලැබුවේ. පාසලේදීත් විෂයක් ලෙසින් නර්තනය හැදැරුවා. ඉන්පසුව මහරගම යූත් නර්තන කණ්ඩායමට සම්බන්ධවෙලා හිටියා.

නර්තනයට අමතරව මල්ෂා ක්‍රීඩාවටත් ගොඩක් දක්ෂයි නේද?

ක්‍රීඩා වෙනුවෙන් මම පදක්කම් තුන්සිය පනහකට වැඩි ගණනක් දිනාගෙන තියෙනවා. වසර දෙකක් නාවික හමුදා ක්‍රීඩා සංචිතයට ඇතුළත්ව සිටියා. 2010 වසරේදී දුර පැනීමේ ඉසව්ව වෙනුවෙන් දකුණු ආසියානු ක්‍රීඩා උළෙලේදී ලංකාව නියෝජනය කළා. දුර පැනීමේ ඉසව්වේ බස්නාහිර පළාත් තරඟ වාර්තාවකුත් මා සතුයි.

සිරස ඩාන්සින් ස්ටාර් වේදිකාව වෙනස් කළ චරිතයක් ලෙසින් ඔබ ප්‍රසිද්ධයි?

මට හැමදාම ඕනි වුණේ වෙනසක් කරන්න. ඒ වගේම අභියෝගාත්මක දේ කරන්නත් කැමැතියි. ඒ නිසා මම කේබල් අධාර කරගෙන කරන නර්තනයක් සහ ජල ටැංකියක් තුළදී කරන නර්තනයක් ඉදිරිපත් කළා. සිරස ඩාන්සින් ස්ටාර් වේදිකාවේ විතරක් නෙවෙයි මීට පෙර මෙරට කිසිම වේදිකාවක එවැනි නර්තනයන් ඉදිරිපත් වෙලා තිබුණේ නැහැ.

ඔබ එවැනි නර්තනයන් ප්‍රගුණ කළේ කෙහොමද?

මම අන්තර්ජාලයෙන් එවැනි නර්තන දැකලා තිබුණා. සංඛ ප්‍රසාද් ගුරුතුමා තමයි මගේ නර්තන ගුරුවරයා වුණේ. සංඛ සර්ගේ මග පෙන්වීම ඔස්සේ මට සාර්ථකව එය ඉදිරිපත් කරන්න හැකි වුණා. ජල ටැංකියේ නර්තනය පිහිනුම් තටාකයක මුලින්ම පුහුණු වුණා. ඊට පසුව තාත්තාගේ මිතුරෙක් වූ සුමිත් මාමා තමයි ටැංකිය හදලා දුන්නේ. කේබල් වලට උදව් කළේ සුනිල් මාමා.

කේබල් ආධාරයෙන් ඉහළ අවකාශයේ නර්තනයේ යෙදෙනකොට මල්ෂාට බය හිතුණේ නැද්ද?

බය හිතුණේ නැහැ. නටන්න කලින් මම සුනිල් මාමා ගෙන් අහනවා ෂුවර්ද කියලා. බය නැති වෙන්න කේබල් කඩා වැටෙන්නේ නැහැ කියන විශ්වාසය ඔහු ඇති කළා. ඒ වගේම වේදිකාවේ වෙනසක් කරන බලාපොරොත්තුව නිරතුරුව මා දිරිමත් කළා.

ඩාන්සින් ස්ටාර් තරගයේදී වරින්වර වර්ෂාව වැටෙන්න සළස්වලා තිබුණා. ජල ටැංකියේ නර්තනයේදී පුහුණුවීම් අතරතුර මම හුස්ම ගන්න එළියට එන වෙලාව වෙනකොටම වැස්ස වැටුණා. එතකොට නම් හුස්ම හිර වෙනවා වගේ දැණුනා. මම ඉක්මනට ඒක නවත්වන්න කිව්වා. ඊට පස්සේ දවසක හීනෙනුත් ඒක දැකල ආයෙමත් බය වුණා.

මල්ෂාගේ පෞද්ගලික තොරතුරුත් කියන්න?

මගේ තාත්තා ජී. ඩි රාජපක්ෂ. ඔහු ව්‍යාපාරිකයෙක්. අම්මා පී මුතුගල. ඇය ගුරුවරියක්. අයියා දිලීප. ෂෙහාන්, කස්සප කියලා මල්ලිලා දෙන්නෙක් ඉන්නවා. තාත්තයි අම්මයි මුලින්ම මම ඩාන්සින් ස්ටාර් තරගයට එනවාට කැමැති වුණේ නැහැ. ශ්‍රීමති ලියනගේ මගේ නැන්දා තමයි මාව හැමදේටම එක්කරගෙන ආවේ. අවසන් 32ට සුදුසුකම් ලැබුවට පස්සේ අම්මයි තාත්තායි ගොඩක් සතුටු වුණා.

මල්ෂාට මේ ජය ලබන්න සහය වූ අනෙකුත් අය ගැනත් සිහිපත් කළොත්?

ලොකු පිරිසකගේ සහයෝගය මට ලැබුණා. සංජය මුරගල ගොඩක් උදව් කළා. ගීත ගොඩක් හොයලා දුන්නේ සංජය. නිමල් සුපර් ලයිට් වගේම මගේ ඇඳුම් නිර්මාණය කළේ සතිස කොස්ටියුම්ස් වෙනුවෙන් සංජය. මගේ පවුලේ අයත් මට දැවැන්ත ශක්තියක් වුණා.

අවසාන වශයෙන් මල්ෂාට කියන්න පණිවුඩයක් තියෙනවාද?

මගේ ගුරුවරුන්ට සහ ලංකාව පුරා විසිරි සිටින රසික රසිකාවන්ට මගේ හදපිරි ප්‍රණාමය පිරිනමනවා. මගේ ජයග්‍රහණයට මේ හැමෝගෙන්ම ආශිර්වාදය ලැබුණා. ඒ වගේම මට මේ අවස්ථාව ලබා දුන් සිරස ආයතනයටත් මේ අවස්ථාවේදි මා ස්තූතිවන්න වෙනවා.

යතේජා ඥානරත්න
ඡායාරූප – මාලන් කරුණාරත්න

සරසවිය