ශ්‍රී ලංකා නිදහස් පක්ෂයේ සියලුම ඇමැතිවරු පාර්ලිමේන්තු හා පළාත් සභා මන්ත්‍රිවරු අද (30දා) පෙරවරුවේ බේරුවල සිනමන් සිටි හෝටලයට රැස්වෙති. ඒ ඉදිරියේ පැවැත්වීමට නියමිත ජනාධිපතිවරණය ඇතුළු ජාතික මට්ටමේ මැතිවරණ පිළිබඳ රජයේ ඉදිරි දේශපාලන වැඩපිළිවෙළ ජනතාව අතරට ගෙනයෑම පිළිබඳ දැනුම්වත් කිරීම සඳහා ජනාධිපති මහින්ද රාජපක්ෂ මහතාගේ ප්‍රධානත්වයෙන් පැවැත්වෙන විශේෂ වැඩසටහනකට සහභාගි වීමටය.
ශ්‍රී ලංකා නිදහස් පක්ෂය මේ දිනවල සිය පක්ෂ සංවිධානය, ආසනබල මණ්ඩල දේශපාලන වශයෙන් ශක්තිමත් කිරීමේ වැඩ සටහනක යෙදී සිටී.
මේ දිනවල ආණ්ඩුවේ ඇතැම් ඇමැතිවරුන් ප්‍රසිද්ධියේ එකිනෙකා විවේචනය කර ගනිමින් කෙරෙන ප්‍රකාශ හා අනියමින් ආණ්ඩුවේ ඇතැම් ක්‍රියාකාරකම් සියුම් ලෙස විවේචනය කිරීම සම්බන්ධයෙන්ද මේ වැඩසටහනේදී ජනාධිපතිවරයා කරුණු දැක්වීමක් කරණු ඇතැයිද අපේක්ෂා කෙරේ.
කෙසේ නමුත් පසුගියදා එක්සත් ජාතික පක්ෂයේ නායකත්ව මණ්ඩලය හා තවත් පිරිසක් කොළඹ හෝටලයකට රැස්වී ඉදිරි දේශපාලන ක්‍රියා මාර්ග සම්බන්ධයෙන් සකච්ඡා කිරීම ගැන ආණ්ඩුවේ ඇතැම් මැති ඇමැතිවරුන් අතින් විවේචනය වුයේ සිරිකොත මුලස්ථානය තිබියදී හෝටල්වලට රැස්වී රහස් කතා පවත්වන බව කියමිනි.
වසර විසි හතරකට පෙර මඩකලපුව කුරුක්කල්මඩම් ප්‍රදේශයේ එල්ටීටීඊ සංවිධානය විසින් පැහැර ගෙන ගොස් ඝාතනය කෙරුණු බවට සැක කෙරෙන, මුස්ලිම් ජාතිකයන්ට අයත් මිනීවලක් බවට හඳුනා ගෙන ඇති ස්ථානයක් යලි ගොඩ දැමීම සඳහා මීළඟ අඟහරුවාදාට කටයුතු යොදන මෙන් අධිකරණය පොලීසියට නියෝග කර තිබේ.
එක්දහස් නවසීය අනූව වසරේ ජුනි මාසයේ මඩකලපුව කල්මුනේ මහා මාර්ගයේ රථවාහනවල ගමන් ගත්, කාත්තන්කුඩිය ඇතුළු අවට ප්‍රදේශවල පදිංචී මුස්ලිම් ජාතිකයන් එකසීය හැටපස් දෙනෙකු , කුරුක්කල්මඩම් ප්‍රදේශයේදී එල්ටීටීඊ සංවිධානය විසින් පැහැර ගෙන ගොස් ඝාතනය කර වෙරළ ප්‍රදේශයේ වල දමා ඇතැයි මුස්ලිම් ජාතිකයන් දිගින් දිගටම කළ චෝදනා අනුව මෙම පරීක්ෂණය ආරම්භ විය.
ඉල්ලීමක්
ඝාතනය කළ බවට සැක කෙරෙන පුද්ගලයන්ගේ සිරුරු කොටස් ගොඩ ගෙන ඉස්ලාම් ආගමට අනුව අවසන් කටයුතු කිරීමට උදව් කරන මේන් ඝාතනය කෙරුණු බව පැවසෙන මුස්ලිම් ජාතිකයන්ගේ ඥාතීන් කීහිප දෙනෙකු කලවන්චිකුඩි පොලිසියෙන් ඉල්ලීමක් කර තිබෙන බවයි පැවසෙන්නේ.
මුස්ලිම් ජාතිකයන් ඝාතනය කර වල දමා ඇති බවට සැක කෙරෙන වෙරළ ප්‍රදේශයට මේ වන විට පොලිස් ආරක්ෂාව යොදවා ඇති බව පොලිස් මාධ්‍ය ප්‍රකාශක ජේෂ්ඨ පොලිස් අධිකාරී අජිත් රෝහණ ප්‍රකාශ කළේය.
උතුරු හා නැගෙනහිර පළාත්වල අතුරුදන්වූවන් පිලිබඳ පරීක්ෂණ කොමිසම මඩකලපුව දිස්ත්‍රික්කයේ කරන ලද පරීක්ෂණ කටයුතුවලදී, ඝාතනය කෙරුණු බවට සැක කෙරෙන පුද්ගලයන්ගේ ඥාතීන් මේ සම්බන්ධව ප්‍රකාශ ලබා දී තිබේ.
එම මිනී වලවල් තුල ඇති ශරීර කොටස් ගොඩ ගෙන ඉස්ලාම් ආගමට අනුව අවසන් කටයුතු කිරීමට කොමිසම සහය දිය යුතු බවට ඝාතනය කළා යැයි සැක කෙරෙන පුද්ගලයන්ගේ ඥාතීන් ඉල්ලීමක් කළ අවස්ථාවේ ඊට ප්‍රතිචාර දැක වූ කොමිසමේ සභාපතිවරයා ඇතුළු නියෝජිතයන් එම ස්ථානයට ගොස් නිරීක්ෂණ කටයුතු කළ බවත් පැවසේ.
(බීබීසී සංදේශය)
ජාතිවාදය සහ ආගම්වාදය ඉස්මතු වන දේශපාලන පක්ෂ නාම ලියාපදිංචි නොකිරීම කෙරෙහි මැතිවරණ කොමසාරිස් මහින්ද දේශප්‍රිය මහතාගේ දැඩි අවධානය යොමුව තිබේ.
එවැනි පක්ෂ ලියාපදිංචියේ දී දේශපාලනඥයින් සහ පක්ෂ සාමාජිකයින් විසින් සිය පෞද්ගලික මතවාද පොදු ජනතාව අතරට ගෙනයාමෙන් ඇතිවන අනවශ්‍ය ගැටුම් නතර කිරීම මෙහි ප්‍රධාන අරමුණ වී ඇත.
මේ වන විටත් පවතින එවැනි දේශපාලන පක්ෂ දෙකක නම් එම පක්ෂවල නියෝජිතයන්ගේ ද පූර්ණ එකඟාතව මත වෙනස් කළ බව දේශප්‍රිය මහතා ‘ පැවසීය.
ඒ අනුව අකිල ඉලංගෙයි මුස්ලිම් කොංග්‍රසය අකිල ඉලංගෙයි මහජන කොංග්‍රසය ලෙස සංශෝධනය වී ඇති අතර එක්සත් මුස්ලිම් පෙරමුණ එක්සත් සාම පෙරමුණ ලෙස සංශෝධනය වී ඇති බව ද මැතිවරණ කොමසාරිස්වරයා සඳහන් කළේය.
මේ අතර අලුතෙන් පක්ෂ ලියාපදිංචියේ දී ජාතීන් සහ ආගම් අතර ගැටුම් ඇතිවීම කෙරෙහි බලපාන පක්ෂ නාම සඳහා ඉඩ ලබා නොදීමට පියවර ගන්නා බව ද දේශප්‍රිය මහතා කියා සිටියේය.
ඒ සඳහා එම පක්ෂවල නියෝජිතයින් ද එකඟකරවා ගැනීමට තමන් කටයුතු කරන බව ද හෙතෙම වැඩිදුරටත් සඳහන් කළේය.
(srilankamirror)
යලිත් වරක් මෝටර් රථ ධාවන තරඟ මහනුවර නොපවත්වන බවට සංවිධායකයන් ප්‍රතිඥා දුන් බැවින් මේ සති අන්තයේ එම තරඟ පැවැත්වීමට අනුමැතිය පළ කළ බව අස්ගිරි මහ නාහිමියෝ පවසති.
එළැඹෙන සති අන්තයේ රාත්‍රී මෝටර් රථ තරඟ පැවැත්වීම පිණිස දැනටමත් විශාල මුදලක් වැය කොට ඇතැයි සංවිධායකයන් තමන්ට දැනුම් දුන් බව මාධ්‍යවේදීන් කළ විමසීමකදී කියා සිටි උඩුගම ශ්‍රී බුද්ධරක්ඛිත මහානාමියෝ, එබැවින් මේ වතාවේ පමණක් එම තරඟ මහනුවර පැවැත්වීමට සිය අනුමැතිය පළ කළ බව සඳහන් කළහ.
අදාළ තරඟ පැවැත්වෙන්නේ දළදා මාලිගාව පවතින වීදියේ නොවන බවත් මහානායක හිමියන් සඳහන් කළ බව ලංකාදීප මාණ්ඩලික වාර්තාකරු ජේඒඑල් ජයසිංහ බීබීසී සංදේශයට පැවසූහ.
විරෝධය
ශ්‍රී ලංකාවේ පමණක් නොව ලෝකවාසී බෞද්ධ ජනතාවගේ මුදුන් මල්කඩක් ලෙස සැලකෙන මහනුවර දළදා නගරයේ පැවැත්වීමට කටයුතු යොදා ඇති රාත්‍රී මොටර් රථ සැණකෙළිය නතර කරන්නැයි ත්‍රෛනිකායික මහානායක හිමිවරුන් ජනාධිපති මහින්ද රාජපක්ෂගෙන් ඉල්ලීමක් කොට තිබුණි.
මෙවැනි සැණකෙළියක් පැවැත්වීම නගරයේ පූජනීයත්වයට මෙන්ම අභිමානයටද හානිකර බව, මහානායක හිමිවරුන් විසින් සඳුදා ජනාධිපතිවරයා වෙත යවන ලද ලිපියේ සඳහන් කොට තිබිණ.
මේ අතර අඟහරුවාදා රැස් වූ මහනුවර දිස්ත්‍රික් ශාසනාරක්ෂක බල මණ්ඩලය රාත්‍රී මෝටර් රථ තරඟවලට ප්‍රබල විරෝධය පළ කරමින් යෝජනාවක් සම්මත කොට ඇත.
පාර්ලිමේන්තු මන්ත්‍රී නාමල් රාජපක්ෂ ඇතුළු ආණ්ඩු පක්ෂයේ පාර්ලිමේන්තු මන්ත්‍රීවරුන් කණ්ඩායමක් අලුත්ගම හා දර්ගා නගරයේ ගැටුම් වලින් හානියට පත් ජනතාව හමු වෙති.
එම ප්‍රදේශවල පැවති ගැටුම් හේතුවෙන් හානියට පත් දේපළ හා එහි ප්‍රමාණය සොයා බැලීම මෙම සංචාරයේ අරමුණ විය.
ගැටුම් වලින් දැඩි ලෙස හානියට පත් දර්ගා නගරයේ තත්වය විමසමින් එම ප්‍රදේශයේ විපතට පත් මුස්ලිම් වැසියන් හමුවූ මන්ත්‍රීවරයා, ප්‍රදේශයේ මුස්ලිම් පල්ලියට පැමිණ ඒ අවට ප්‍රදේශයේ මුස්ලිම් ආගමික නායකයන් හමු විය.
පතිරාජගොඩ ශ්‍රී විවේකාරාම විහාරාධිපති හිමියන් ඇතුළු ගැටුම් වලින් හානියට පත් සිංහල පවුල් හමුවූ පාර්ලිමේන්තු මන්ත්‍රීවරයා ඔවුන්ගෙන් තොරතුරු විමසා බැලිය.
පීඩාවට පත් ජනතාවට සහන ලබා දෙමින් ප්‍රදේශය යළි ගොඩ නැංවීමට අවශ්‍ය වැඩපිළිවෙළ පිළිබඳ නාමල් රාජපක්ෂ මන්ත්‍රීවරයා ඇතුළු ආණ්ඩු පක්ෂයේ මන්ත්‍රී කණ්ඩායම ප්‍රදේශයේ රජයේ නිලධාරීන් සමග සාකච්ඡා පැවැත් වූ බවත් මෙම ගමනට එක් වූ පාර්ලිමේන්තු මන්ත්‍රී උදිත් ලොකුබණ්ඩාර බීබීසී සංදේශයට පැවසුවේය.
බේරුවල සහ අලුත්ගම යන නගර ඇතුළු ඒ අවට ප්‍රදේශවල පැවති ගැටුම් පිළිබඳ නිවැරදි තොරතුරු ශ්‍රී ලංකාවේ මාධ්‍ය ආයතනවලට වාර්තා කිරීමට ඉඩ නොදී ශ්‍රී ලංකා රජය විසින් මාධ්‍ය වාරණයක් පනවා තිබූ බව ආණ්ඩු පක්ෂය නියෝජනය කරන ජාතික හෙළ උරුමයේ පාර්ලිමේන්තු මන්ත්‍රී අතුරලියේ රතන හිමියන් ප්‍රකාශ කරයි.
එවැනි මාධ්‍ය වාරණයක් පැනවීම නිසා අසත්‍ය තොරතුරු ලොව පුරා පැතිරී ගිය බව ජාතික හෙළ උරුමයේ පාර්ලිමේන්තු මන්ත්‍රී අතුරලියේ රතන හිමියන් ප්‍රකාශ කළේය.
රට තුල ඉස්ලාම් අන්තවාදයක් තිබේ නම් ඒ සඳහා සිංහල අන්තවාදයක් නිර්මාණය කිරීම තුලින් එය පරාජය කළ නොහැකි බවයි උන් වහන්සේ කියා සිටියේ.
මුස්ලිම් සමාජයද ජාතික සමගියට බාධා වන කටයුතු වලින් ඉවත් වීම වැදගත් වන බවත් උන් වහන්සේ කියා සිටියි.
ජාතික සමගිය
ශ්‍රී ලංකා මුස්ලිම් කවුන්සිලය නියෝජනය කරමින් පැමිණි සිටි පිරිස අදහස් දක්වමින් කියා සිටියේ මුස්ලිම් ජාතිකයින් අන්තවාදීන් බවට පල වන අදහස් පිළිගත නොහැකි බවයි.
ආගම් අතර පවතින අනවශ්‍ය බාධක ඉවත් කිරීම තුලින් ජාතික සමගිය ගොඩනැගිය හැකි බවයි එහිදී දමිළ සමාජය නියෝජනය කරමින් අදහස් දැක්වූ චාවකච්චේරියේ ලේඛකයකු වන සචිත්තානාදන් කියා සිටියේ.
ආගම් තිබෙන්නේ බෙදී සිටින සමාජයක් එක්සත් කිරීමට මිස සමගියෙන් සිටින සමාජයක් බෙදා වෙන් කිරීමට නොවන බවත් ලේඛක සචිත්තානාදන් අවධාරණයෙන් කියා සිටියේය.
ලොව ප්‍රථම වරට තුර්කියේ ඉස්තාන්බුල් නගරයේදී ලිංග විපර්යාසයට ලක් වුවන්ගේ රුප සුන්දරී තරගයක් පැවැත් උනා.
මේ සඳහා එරට වාසය කරන සමලිංගික, ලිංගිකත්වය වෙනස් කරගත් හා ද්වි ලිංගික (lesbian, gay, bisexual and transgender) විශාල පිරිසක් සහබාගි වී සිටියා. තුර්කිය තුල සමලිංගිකත්වය නීති ගත කර තිබෙනවා.
නමුත් 2002 සිට සමලිංගික හා ලිංගිකත්වය වෙනස් කරගත් පුද්ගලයන් 70ක් පමණ මර දමා තිබෙන බවයි වාර්තා වෙන්නේ. මේ තරඟය පැවත් උනේ ඔවුන්ට එරෙහිව සිදුවන එවැනි හිංසා කිරීම් වලට එරෙහි වීමේ අරමුණ ඇතිවයි.
විවිධ අංග රැසකින් සමන්විත වූ මෙම තරඟාවලිය සඳහා තරඟකරුවන් 13ක් පමණ සහබාගි උණු අතර ජයග්‍රහණය ලබාගැනීමට සමත් උනේ Yanki Bayramoglu නම් සුරුපිනියයි.
