පානීය ජලය සපයා ගන්නා ජල මූලාශ්‍රයන්හි ජල මට්ටම් සීග්‍රයෙන් පහත බසිමින් පවතින බවද ජාතික ජල සම්පාදන හා ජලාපවහන මණ්ඩලය සඳහන් කරයි. අධික වියළි කාලගුණික තත්ත්වය සමග ජල පාරිභෝජනයද ඉහළ මට්ටමක පවතින බව එම මණ්ඩලය කියයි.
එමෙන්ම,උස් බිම් ප්‍රදේශවල ජල පාරිභෝගිකයන්ට ජලය බෙදා හැරීමේදී අඩු පීඩන තත්ත්වයන් ඇතිවිය හැකි බැවින් ජලය අරපිරිමැස්මෙන් භාවිත කරන ලෙසද ජාතික ජල සම්පාදන හා ජලාපවහන මණ්ඩලය මහජනතාවගෙන් ඉල්ලා සිටී. වාහන සේදීම, ගෙවතු වගාව ආදී කටයුතු සඳහා ජලය යොදා ගැනීම අවම කරන ලෙසත්, අත්‍යවශ්‍ය දෛනික කටයුතුවලට පමණක් ජලය යොදා ගන්නා ලෙසත් එම මණ්ඩලය මහජනතාවට දැනුම් දෙයි.
වියළි කාලගුණික තත්ත්වය හේතුවෙන් දිවා කාලයේදී සියයට 20 ක ජල විදුලි ධාරිතාවක් නිෂ්පාදනය කරන බවත්,සූර්ය පැනල ඔස්සේ වැඩි විදුලි ධාරිතාවක් නිෂ්පාදනය කෙරෙන බවත් ලංකා විදුලිබල මණ්ඩලය සඳහන් කරයි.
එමෙන්ම, විදුලි ඉල්ලුම ඉහළ අවස්ථාවන්හිදී තාප සහ දැවිතෙල් බලාගාරවලින් විදුලිය නිෂ්පාදනය කෙරෙන බවද එම මණ්ඩලය කියයි. නොරොච්චෝලේ “ලක් විජය’’ බලාගාරයේ විදුලි ජනන යන්ත්‍ර තුනෙන්ම මෙගාවොට් 900 ක විදුලි ධාරිතාවක් නිෂ්පාදනය කෙරෙන බවත්,කැලණිතිස්ස නැප්තා බලාගාරය සහ සපුගස්කන්ද දැවි තෙල් බලාගාරය ක්‍රියාත්මක බවත් ලංකා විදුලිබල මණ්ඩලය සඳහන් කරයි.
වාරිමාර්ග දෙපාර්තමේන්තුව සඳහන් කරන්නේ එම දෙපාර්තමේන්තුව යටතේ පාලනය වන ප්‍රධාන ජලාශ 73 හි සමස්ත ජල ධාරිතාව සියයට 85.7 ක මට්ටමක පවතින බවය.
