එම වාර්තාව අනුව මෙරට ඇති සියලුම බන්ධනාගාරවල රඳවා තැබිය හැකි සමස්ත රුඳවියන් සංඛ්‍යාව 11,291 වුවද 2022 දෙසැම්බර් 31 දින වන විට රඳවා සිටි සංඛ්‍යාව 26,176 දෙනෙකි. ඔවුන්ගෙන් සිරදඬුවම් විඳින පිරිස 9,449ක් වන අතර සැකකරුවන් සංඛ්‍යාව 16,727 දෙනෙකි.
ඒ අනුව ඒවායේ රඳවන ලද පිරිස රුඳවිය හැකි සංඛ්‍යාවමෙන් 232% ක පමණ ප්‍රමාණයක් යැයි එම වාර්තාව පෙන්වා දෙයි. 2015 දෙසැම්බර් 31 වන විට බන්ධනාගාරගත සංඛ්‍යාවේ ප්‍රතිශතය 139%ක් වූ අතර එය වසර 7ක කාලයක් තුළ 232% දක්වා වර්ධනය වී තිබේ.
බොහෝ රුඳවියන් වයස අවුරුදු 30 – 40 අතර වයස්වල පසුවන්නන් බවද ඔවුන් අතුරින් 53%ක්ම මත්ද්‍රව්‍ය වැරදි සම්බන්ධයෙන් සිරගත වූවන් බවද වාර්තාවේ සඳහන්ය. සිරකරුවන් නඩත්තු කිරීම සඳහා රජයට වසරකට රුපියල් බිලියන අටක් පමණ වැයවන බව වාර්තා වෙයි.
මේ දිනවල ක්‍රියාත්මක යුක්තිය මෙහෙයුම යටතේ බොහෝ පිරිස් අත්අඩංගුවට පත්ව සිටිති. බන්ධනාගාර කොමසාරිස් ජනරාල් තුෂාර උපුල්දෙණිය මහතා පෙන්වා දෙන්නේ 2024 වන විට බන්ධනාගාරගත සමස්ත පිරිස 232% ක් නොව 290% දක්වා වැඩි වී ඇති බවය. විශේෂයෙන් නාගරික බන්ධනාගාරවල තදබදය ඉතා අධික වන අතර එය 300% වැනි ප්‍රමාණයක් බවද ඔහු සඳහන් කරයි. සාමාන්‍යයෙන් රුඳවිය හැකි සමස්ත සංඛ්‍යාව 11,700ක් වුවද මේ වන විට රුඳවියන් 32,735ක් බන්ධනාගාරවල රඳවා ඇතැයි ඔහු පෙන්වා දෙයි.
- දේශය
