ශ්‍රීලනිපයේ මෛත්‍රී පාර්ශ්වය වෙනුවෙන් කණ්ඩායම් කිහිපයම මහින්ද රාජපක්ෂ, බැසිල් රාජපක්ෂ, ගොටාබය රාජපක්ෂ හා චමල් රාජපක්ෂ සමඟ වෙන වෙනම කළ සාක්ච්ඡා සියල්ලම මේ අනුව අවසන් කර දමා එම කණ්ඩායම ශ්‍රිලනිපයෙන් ඉවත් කර ශ්‍රිලනිපය, ජනාධිපති මෛත්‍රීපාල සිරිසේන මහතාගේ නායකත්වයෙන් යුතුව ශක්තිමත් කිරීමට තීරණය වී තිබේ. එජාප විරෝධී කණ්ඩායමක් ලෙස 'ඒකාබද්ද විපක්ෂය' ලෙස ජනාධිපතිවරයාගේම අශීර්වාදය හා අනුමැතිය යටතේ මෙම කණ්ඩායම මෙතෙක් ක්‍රියාත්මක වුවත් මෙම පිරිස හුදු මෛත්‍රී විරෝධය මත පදනම්ව කටයුතු කරන බවත් මෛත්‍රීපාල සිරිසේන මහතාව ශ්‍රීලනිප නායකත්වයෙන් ඉවත් කර බලය තහවුරු කර ගැනීම සඳහා කුමන්ත්‍රණකාරීව කටයුතු කර ඇති බවත් මේවන විට හෙළිදරවී තිබේ.
එමෙන්ම ජි එල් පිරිස් මහතාගේ සභාපතිත්වයෙන් යුතුව ගොඩනඟා ගෙන ඇති පක්ෂය මහින්ද රාජපක්ෂගේ නායකත්වයෙන් යුතුව ක්‍රියාත්මක වීමට නියමිත නව පක්ෂය බව ප්‍රකාශයට පත් වීම එම පාර්ශ්වය ශ්‍රිලනිපය දෙකඩ කිරීමට ගත් තීන්දුව ස්ථිර කිරීමක් බවත් පැහැදිලිය. මේ නිසා තව දුරටත් රාජපක්ෂ පාර්ශ්වය සමඟ සාකච්ඡා පැවැත්වීම වෙනුවට ඊට එරෙහිව ක්‍රියාත්මක වීම විය යුතු බවත් ජනාධිපතිවරයාගේ පාර්ශ්වයේ කැමැත්ත වී තිබේ.
මේ අනුව ඉදිරියේදී ශ්‍රිලනිපය දෙකඩ කිරීම සඳහා රාජපක්ෂවරු ගත් ද්‍රෝහී ක්‍රියාමාර්ගය හෙලිදරව් කර ඔවුන්ව දේශපාලනිකව පරාජයට පත් කිරීමට දැඩි ක්‍රියා මාර්ග ගැනීමටද නියමිතය. එමෙන්ම යළි රාජපක්ෂලාව ශ්‍රිලනිපයට වද්දා නොගැනීමට දැඩි තින්දුවක් ගෙන ඇති අතර ශ්‍රිලනීපය තුල සිටිමින් රාජපක්ෂවරුන්ගේ කුමන්ත්‍රණකාරී සැලසුම් සමඟ කටයුතු කරන සියලු පුද්ගලයන්ට එරෙහිව කටයුතු කිරීමටද ශ්‍රිලනිපය තීන්දු කර තිබේ.
මේ අතර ශ්‍රිලනිපය දෙකඩ කිරීම සඳහා එජාප නායකත්වය සූක්ෂම ලෙස ගෙන ගිය කටයුත්තට සහය දක්වා රාජපක්ෂවරු ශ්‍රිලනීපයෙන් ඉවත් කරවීම පහසු කරවිය යුතු බවටද ශ්‍රීලනිපයේ ජේෂ්ටයන් කිහිප දෙනෙකුම යොජනා කර තිබේ. රට පුරා කෙරුණු සමීකෂණයකින් තහවුරු වී ඇත්තේ රාජපක්ෂවරුන්ට නව පක්ෂයක් පිහි‍ටුවා ශ්‍රිලනිපයට අභියොග කිරීම හැකියාවක් නොමැති බවය. එජාපය සමඟ එක්වී රටේ අභිවෘද්ධිය වෙනුවෙන් ගන්නා ක්‍රියාමාර්ගයන් හී වාසිය ශ්‍රීලනිපයටද අත්පත් කර ගැනීම මෙන්ම එය වඩා නිවැරදී දිසාවට යොමු කිරීමට ශ්‍රිලනිපයේ සහය දැක්වීම මඟින් සාමාන්‍ය මහ ජනතාවගේ ආකර්ෂණය ජනාධිපති මෛත්‍රීපාල සිරිසේන මහතාට පහසුවෙන් අත්පත් කර ගැනීමට පහසු හැකියාවක් තිබෙන බැවින් රාජපක්ෂවරුන්ගේ කැඩී වෙන්වීම ශ්‍රීලනීපයේ ඡන්ද පදනමට බරපතල හානියක් සිදු නොවන බවත් ශ්‍රිලනිප ජේෂ්ඨයන්ගේ මතය වී තිබේ.
මේ මොහොතේ රාජපක්ෂවාදීන්ව සිටින බහුතරගේ මතය වී ඇත්තේද ශ්‍රිලනීපය නොකඩා පක්ෂය තුල බලය අල්ලාගෙන දේශපාලනය කරනවා මිසක වෙනම පක්ෂයක් ගොඩනඟා ගැනීම මෝඩ තීරණයක් බවය. ඒ අනුව නව පක්ෂයට එම බහුතර පිරිස එක් නොවනුද ඇත. සිංහල බෞද්ධ ජාතිවාදී මතයක සිට කටයුතු කිරීම හා එල්ලව ඇති දුෂණ වංචා චෝදනා මත සාමාන්‍ය ජනතාවගේ ආකර්ෂණයක් නව පක්ෂය වෙත දිනා ගැනීමට නොහැකි බවත් යම ලෙසකින් ඉදිරි වසර කිහිපය තුලදී ආණ්ඩුව ක්‍රියත්මක කිරීමට නියමිත සංවර්ධන කටයුතු වැඩි ජන ආකර්ෂණයක් ලබා ගැනීමට සමත් වුවහොත් තත්වය තවත් අසීරුවනු ඇති බවත් මෙම පිරිස පෙන්වා දී තිබේ. එමෙන්ම මේවන විට අත්හි‍ටුවා හෝ මන්දගාමීව තිබෙන දූෂණ වංචා චෝදනා සම්බන්ධයෙන් වන විමර්ශන කටයුතුද සක්‍රීය වීම විය හැකි බවත් ඒ තමන්ගේ දේශපාලන ජීවිතයට බරපතල හානි ගෙන දිය හැකි බවත් එම පිරිස අවධාරණය කර ඇත.
මේ අනුව මහින්ද රාජපක්ෂ ඇතුලු එම සමිපතමයන් දැඩි දේශපාලන අර්බුදයකට මුහුන පා ඇත. මේ තත්වය මත මඟ සිටියොත් තා නසී ගෙදර ගියොත් අඹු නසී යන්නට සමාන තත්වයකට මේවන විට මහින්ද රාජපක්ෂ මහතා පත්ව සිටී.
