එම ආරංචිමාර්ග සඳහන් කරන ආකාරයට මෙම ගනුදෙනුවේදී කිසිඳු ටෙන්ඩර් කැඳවීමක් හෝ පිළිගත් ක්‍රමවේද කිසිවක් අනුගමනය කර නැති අතර ඒ වෙනුවට සෘජුවම පකිස්ථාන් ගුවන් සමාගමට A 350 ගුවන්යානා සැපයීම සම්බන්ධව සාකච්ඡා සිදුව ඇත. මෙම ගනුදෙනුවේදී පවතින වෙළඳපොල බදු කුලී මිල ගණන් සලකා නැති බවත් ඒ වෙනුවට පකිස්ථාන ගුවන් සමාගමට වාසි සහගත වන අයුරින් ගනුදෙනුව තීන්දු කර ගෙන ඇති බවත් එම ආරංචිමාර්ග වැඩිදුරටත් සඳහන් කර සිටියි.
අදාළ ගනුදෙනුව නිශ්චිතවම අගෝස්තු මාසය තුළ සිදුවන බව පසුගියදා කොළඹ පැවති මාධ්‍ය හමුවකදී ව්‍යාවසාය සංවර්ධන අමාත්‍ය කබීර් හෂීම් අමාත්‍යවරයාද දැනුම් දුන් අතර පකිස්ථාන ගුවන්සේවයද මේ බව තහවුරු කර තිබේ.
මෙහිදී මතුවන ගැටලුව නම් මෙසේ අඩු බඳු පොලියකට පකිස්තානයට දෙන්නට යන ගුවන් යානා වෙනුවෙන් මේ වන විටත් මාසයකට ඇමරිකානු ඩොලර් මිලියන 1.4 කට ආසන්න බදු මුදලක් අප ගෙවමින් සිටීමය. මෙම යානා කල්බදු ක්‍රමයට ඇනවුම් කළ එයාර් බස් සමාගමට මෙම මුදල් ගෙවමින් තිබේ.
පකිස්තානයට මේ යානා සැපයීම තුළ ඊට අදාළ ටෙන්ඩර් කැඳවීමක් සිදුව නැති අතර මෙම ගනුදෙනුව හරහා රටට කීයක් ලැබෙනවාද? යානා ලබාදෙන්නේ කොපමණ කාලයකටද ? මාසික බදු පොළි අනුපාතය කොපමණද? වටිනාකම් තක්සේරු කළ ආයතනය කුමක්ද ? යන කාරණා පමණක් නොව මේ අතර මැදි පාර්ශ්වය කවුද යන්න වත් මෙතෙක් හෙළිකර නැත. එහෙත් මෙවැනි විශාල ගනුදෙනු වලදී අතර මැදියනට ගනුදෙනුවේ වටිනාකමින් 3%-5% අතර කොමිස් මුදලක් හිමිවෙයි. අනෙක් අතට අප මේ මොහොතේ ගෙවමින් සිටින මුදලට වඩා අඩු මුදලකට පකිස්තාන් ගනුදෙනුව සිදුව තිබේ නම් එම ගනු දෙනුව ගැන සැක සංකා මතුවීම සාධාරණය. එමෙන්ම මෙම ගනු දෙනුව සම්බන්ධයෙන් අගමැතිවරයා ද පූර්ණ දැනුවත් භාවය නොමැති බවත් ඔහුටත් කොළේ වහලා ගසන ඩීල් එකක් බවත් මේ සම්බන්ධයෙන් තතු දත්තෝ පවසා සිටිති.
ශ්‍රී ලංකන් ගුවන් සේවය යනු එදා පැවති රාජපක්ෂ පවුලේ සුඛෝපභෝගී ජීවිත ගත කිරීම සඳහා වියපැහැදම් සොයා ගත් තැනක් වූ අතර එම හේතුව නිසාම අද කෝටි 15000 අධික අලාභයක් සහිතව මෙම ගුවන් සේවය පවත්වා ගෙන යෑමට සිදුව තිබේ.
ඒ කෙසේ නමුත් එම පාඩු ගිණුමට යහපාලනයේ මේ පකිස්තානු ගනුදෙනුවද ඇතුලත් නොවිය යුතුය.
